Health Minister-in Khawzawl a tlawh
Health minister Dr R Lalthangliana chuan nimin khan Khawzawl Zaingen YMA Hall-ah Khawzawl District Task Force (DTF)-te a kâwm a; kohhran hrang hrang hall-a quarantine centre-te tlawhin pawisa a pe a, Khawzawl DC hnenah Covid-19 dona hmanruate a pe bawk.
Dr R Lalthangliana chuan, tun hnaia Mizoram mi leh sa state páwna tangkhangte haw mek mah se, chîâi lo a, fimkhur leh dawhthei taka mi tinte an awm a pawimawh thu a sawi a, Covid-19 kai theihna hmunte thliar thiam a, inthlahdah loa awm reng turin Khawzawl DTF-te a chah.
Health Minister chuan, district headquarters thar pathum - Khawzawl, Hnahthial leh Saitual damdawi-in tan thawktu mamawh zual 30 ṭheuh lak a nih tur thu sawiin, "District Hospital-a hman tur ambulance thar pawh sorkarin a ngaihtuah ang a, ultrasound leh endoscopy khawl enkawl turin a rang lamin technician dah a ni ang," a ti a; thawktu lak turah khawtual mi tling an awm chuan ngaih pawimawh an nih dawn thu a sawi.
Khawzawl additional DC Paul L Khuma'n Covid-19 donaa Khawzawl district-a hmalak dan a tarlan danin, Khawzawl damdawi-inah Covid-19 atan bik khum 20 buatsaih a ni a, Covid-19 do nana hma la turin NSS, tlawmngai pawl leh mimal volunteer mi 292 an inziak lut tawh. State dang mi Khawzawl district-a tangkhang mi 184 an awm a, a tam ber chu kawng siam leh company-a inhlawhte an ni.
Khawzawl district mi leh sa state páwn aṭanga haw tawh zawng zawng chu mi 238 an ni a, hmeichhia 158 leh mipa 80 an ni. Quarantine centre 26 awmin, mi 530 awm theihna tur buatsaih a ni a, tun dinhmunah mi 187 an awm mek.