Rajya Sabha MP thlanna: INC candidate Zoram Sangliana ZPM candidate B Lalchhanzova

Indian National Congress (INC) leh Zoram Peoples' Movement (ZPM) party-te chuan, June 19, 2020-a Rajya Sabha MP tur thlannaa an candidate tur nimin khan an puang. Congress party candidate tur chu PC Zoram Sangliana, Kanan Veng, Aizawl a ni a; ZPM candidate tur chu an party-a general secretary B Lalchhanzova, Dawrpui a ni.

INC candidate tur PC Zoram Sangliana hi Mizoram Assembly inthlanah ṭum nga thlan tlin a ni tawh a; kum 1987, 1989 leh 1993-ahte Tlungvel bialah leh kum 2008 leh 2013-ahte Kolasib bialah thlan tlin a ni. Kum 1989-a thlan tlin a nihin minister of state a ni a, kum 1993-1998 leh 2008-2013 chhungin minister a lo ni tawh bawk.

ZPM Political Affairs Committee (Extended) chu nimin khan ṭhukhawmin, Rajya Sabha MP inthlan awm turah candidate siam an rél a, candidate atan B Lalchhanzova an thlang nghal a ni. B Lalchhanzova hi kum 2018-a Mizoram Assembly inthlanpuiah khan Aizawl East-II bialah ZPM official candidate a lo ni tawh a; eizawnna lamah Cod Nerc-ah director a ni.