Covid-19 test: Vei 5; Vei lo 335
Zoram Medical College (ZMC) Covid-19 Laboratory-a June 4, Ningania mi 340 swab sample endik zinga mi pangain Covid-19 hripui an vei tih hmuh chhuah a ni laiin, mi 335-in hripui an vei lo (negative) tih hmuh a ni. Nimin khan mi 200 chuangte swab sample endik leh a ni a, Covid-19 vei rinhlelh thila State Referral Hospital (SRH)-a dah luh mi 21 an awm bawk.
SRH-ZMC Covid-19 Bulletin-in a tarlan danin, nimina swab sample endik mi 200 chuangte result chu nizan khan chhuak tura beisei a ni a, he thu ziah lai hian a la chhuak lo. Nimina sample endik zingah hian nimina SRH-a dah luh mi 21 zinga 14 an tel a, pasarihte sample erawh chu vawiinah endik a ni ang.
Covid-19 vei hmuh chhuah tawh zinga SRH-a enkawl mek mi 19 zinga pahnih chuan khawsik an neih avangin an taksa a chak lo deuh a, investigation tih mek zel a ni. Mi dangte erawh harsatna an nei lo.
SRH-ah hian Covid-19 vei leh vei lo mi 53 an awm mek a, Covid-19 vei zawng chu Isolation Ward-ah enkawl an ni a, Risk Ward-ah mi 30, NICU-ah mi pakhat leh Holding Ward-ah mi pathum an awm a ni.