Assam-ah Mizoram luhkâ an dang : Mizoram sorkarin Central-ah a thlen : Tripura & Manipur lamah mamawh lâk tum

Mizoram leh Assam inrina bula July 26, 2021-a buaina chhuak kal zelah Assam mite chuan Mizoram mamawh, ei leh bâr châwk luhna kawngpui (national highway) an dan bakah, rél kawng an tichhia. Hemi chungchang hi Mizoram Home Secretary chuan nimin khan Union Home Secretary hnenah ziakin a thlen a, kawng a tlang thuai theih nan hma la turin a ngen. Ni tin mamawhte chu Tripura leh Manipur aṭanga lak luh tum a ni.

Home secretary Lalbiaksangi chuan, NH-306 kawngpui bakah, Mizoram leh Assam inkalpawhna kawngpui dangte chu Assam mite'n July 26 aṭanga tun thlengin an dan thu a tarlang a, "NH-306 hi Mizoram mipui ni tin mamawh lak luhna kawngpui pawimawh ber a nih avangin nasa takin ni tin khawsakah Mizoram mipuite harsatna an siam a ni," a ti.

Lehkhaah hian Lalbiaksangi chuan, Mizoram mamawh lakna kawngpui chu Assam mite'n nikum October 17 aṭanga November 11 thlengin an lo dan tawh bawk thu ziakin, "Kha thil thleng khan nasa takin Mizoram mipui ni tin khawsak a tibuai a ni," a ti a; Assam mite'n vawi tam tak kawngpuite an dang tawh ṭhin tih sawiin, an duh hun huna NH kawngpui leh rél kawng an dang ṭhin chu pawikhawihna lian tak a nih thu a tarlang.

Assam state chhunga Hailakandi district-ah mi tu tih hriat lohte'n Mohammedpur Railway Station leh Ramnathpur Railway Station-ahte rél kawng an tichhia tih tarlangin Lalbiaksangi chuan, "Rél kawng an tihchhiat hi Mizoram tana kawng pawimawh tak, Bairabi Railway Station pawhna kawng awmchhun a ni a, NH kawngpui tih lohah chuan Mizoramin mamawh a lak luh theihna kawng awmchhun a ni," a ti.

Mizoram Home Secretary chuan, NH leh rél kawng chu sorkar laipui ta a nih avangin state sorkar emaw, pawl leh mipui emawte'n dangchat turin thuneihna an nei lo tih a ziak a; pawikhawihna thleng chu sorkar laipuiin a ngaihthah thiang lo tih sawiin, Assam mite'n kawng an dan mek chu an tihtawp theih nan Assam sorkar hnenah khauh taka thu pe turin Union Home Secretary a ngen a ni.

Nimina New Delhi-a an inkawmnaah chief secretary Lalnunmawia Chuaungo pawhin Assam-in kawngpui an dan chungchanga hmala turin Union Home Secretary a ngen bawk a ni.

FCSCA minister K Lalrinliana chuan, Assam mite'n kawng an danchah avangin eirawngbawlna gas, tuialhthei leh ni tin mamawh dangte chu Tripura leh Manipur aṭanga lak luh tum a nih thu a sawi a, "Nimin khan Tripura panin eirawngbawlna gas phur turin truck pali tirh phawt a ni," a ti.

Sorkar thuchhuah tarlan danin, Indian Oil Corporation-in provisional approval an pek angin, tuialhthei chu Dharmanagar Oil Depot, Tripura aṭanga lak luh tur a ni. Dharmanagar-Mizoram via Kanhmun leh Bairabi route pawh mumal taka enfiah a ni a, harsatna awm lo tura ngaih a nih bakah, Mizoram PWD-in kawng chu uluk takin an vil reng a ni.

Barak Valley-ah bandh huaihawt
Nimin, July 28 khan Assam-a Barak Valley-a district pathumah July 26-a Vairengte daia inkahnaa Assam lam mite thihna thleng duh loh entirna atan Barak Democratic Front (BDF) huaihawtin darkar 12 chhung total bandh neih a ni a, mipuiin an thlawp ṭha hle.

Bandh hi Mizoram ramria district pathum Cachar, Hailakandi leh Karimganj district-ahte kalpui a ni a, zing dar 5 aṭanga ṭan niin dawr leh sorkar hmun zawng zawng khar a ni a, lirthei veivak hmuh tur a awm lo. BDF Chief Convenor Pradip Dutta Ray chuan, "Bandh huaihawt lo thei lo dinhmunah kan ding a, kan police-te thihna hial a thleng a, he buaina hi chinfel kan duh a, thisen chhuahna hi thleng leh tawh suh se," a ti.

Krishak Mukti Sangram Samiti leh pawl dangte'n Mizorama lut tur lirtheite chu Hailakandi district-a hmun eng emawzatah an dang chat a, Mohammad railway station bulah Bairabi-a rel lut thei lo turin rel kawng tihchhiat a ni bawk a, Mizorama lut tur lirthei dangtute hian, tiam chin awm loin dan an tum niin Assam lam media-te chuan an tarlang.