Tripura & Manipur aṭangin mamawh lak a ni dawn

Food, Civil Supplies & Consumer Affairs minister K Lalrinliana chuan, tun hnaia ramria buaina thleng avangin gas, tuialhthei leh ni tin mamawh dangte chu Tripura leh Manipur aṭanga lak luh tum a nih thu a sawi a; nimin khan Tripura panin eirawngbawlna gas phur tur truck pali tirh phawt a nih thu Vanglaini palai a hrilh.

FCSCA Minister hoin a pisaah nimin khan Indian Oil Corporation (IOC) leh Food Corporation of India (FCI) hotute leh Railways consultant R Hrangtawna leh FCSCA department hotute an ṭhukhawm a; Mizorama kudam hrang hrangah buhfai quintal 2,60,000 vel leh gas bûr 15,000 vel a awm mek thu tarlan a ni.

Vanglaini palaiin a kawmnaah minister K Lalrinliana chuan, Assam nen ramri chungchangah buaina a la awm fo dawna a lan thu sawiin, chuvang chuan Mizoram mipuite chu intodelh tum ṭheuh tura a duh thu a sawi a , "Leilet leh tlang ram loneiha thar chhuah pawh state páwnah hralh loin, Mizoram chhungah a tam thei ang ber deh ral tum a ṭhain a rinawm," a ti.

K Lalrinliana chuan, Mizorama sumdawngte chu Tripura leh Manipur aṭangin bungrua leh eibar la lut tam tura a duh thu sawiin, "Heta tan hian sorkar pawh a inhawng zau hle a ni," a ti a; Mizoram dep Assam ramri district pathumah total bandh neih mek chu eng chen nge an kalpui dawn hriat a nih loh vangin Mizoram sorkarin gas, tuialhthei leh ni tin mamawhte chu state dang aṭanga lak luh tumin theihtawp a chhuah zel dawn tih a sawi bawk.

Supply Minister chuan, Assam-ah rél kawng tihchhiat a nih avangin Mizoram buhfai tur rél wagon 21 kawng lakah a táng mek a, August 1, 2021-a rawn thleng tur pawh rél kawng a chhiat avangin a thlen hun tur hriat a nih loh thu a sawi a; mipuite chu lo thlapháng lo turin a chah a ni.