Khawzawl Mualvawm field-a phûl lem phah hna thawh mek DC-in a enfiah

Khawzawl DC Zothanmawia chuan nimin khan Khawzawl Mualvawm Field-a phûl lem phah tura hna thawh mek leh pavilion tur sak mek a hmunah a enfiah.

Zothanmawia chuan, hna thawh chu rintlak leh rotling taka thawk turin contractor-te a chah a; harsatna an neihte a sawipui. Contractor-te chuan, hna an thawh chhunzawm reng thu an sawi.

Phul lem phah turah hian khelmual chhuat tur layer pathum phah zawh tawh niin, layer chung ber tur stone dust phah hmabak a ni a, ruahtui tlak lai a nih avangin chawlh lailâwk a ni. Stone dust phah zawh veleh a hungna siam a ni ang a, chumi hnuah phul lem phah a ni ang.

Mualvawm Field siam hna hi UDPA department kaltlangin cheng nuai 476 chuang sêngin Syncotts International-te'n an thawk a, a zau zawng tur chu metre 109-a sei, metre 76-a zau a ni.

Field sira pavilion tur pawh UDPA department hnuaiah contractor dangin sa mekin, a sak nan Rs. 3,71,67,171.74 ruahman a ni a, a dung metre 29.60 leh a vâng metre 11.90-a siam tur a ni.