Police thurâwn angin Hailakandi-a Mizo missionary-te an rawn haw

Mizoram leh Assam inrìna bula July 26, 2021-a inbeihna a thlen hnuah, Assam police-te chuan Hailakandi district-a Mizo missionary-te chu an sahimna atan haw rih turin an ràwn a; chumi avang chuan Gharmura khua leh a chhehvela Mizo 49-te chu July 27, Thawhlehni zan khan Mizoramah an rawn haw.

Synod Mission Board (SMB) secretary Rev. C Zorammawia hnen aṭanga thu dawn danin, July 26-a Mizoram leh Assam police-te inbeihna avangin Gharmura leh a chhehvelah lungawi lohna lantir duhna thawm a awm avangin Assam police-te'n Mizote chu an sahimna atan haw rih mai turin an ngen a ni. Chumi chungchang chu missionary-te chuan SMB-ah an thlen a, SMB hotute chuan Synod Executive Secretary hoa an ngaihtuah hnuah, haw rih turin thutlukna an siam a ni.

Rev. C Zorammawia chuan, Assam police-te'n Mizote hawna tur an ruahmanpui a, Gharmura mite pawhin an buaipui tih sawiin, lirthei an ngaihtuah bakah, state ramri thlengin an veng (escort) tih a sawi a, "Nizan (Thawhlehni zan) dar 7:30 khan Gharmura aṭangin an rawn chhuak a, buaina hranpa an tâwk lo a, him takin Mizoram an rawn thleng," a ti.

Mizo rawn haw, lir­theia inzui zinga a hnung lam deuha mite chu Ramnathpur bazarah mi ṭhenkhatin an lo vawm a, mahse, buaina leh har­satna lian a thleng zui lo. Bairabi an thlenin dam­dawi-inah swab test an ti a, an negative vek a ni.

Kaisanary pastor bial vawngtu Rev. Lalrinsanga sawi danin, July 27 khan Assam sorkar chuan an police thite chu ni thum chhung sûn an nih tur thu a puang a, an state chhung hmun hrang hrangah sûnna hun hmangin mipui an pungkhawm a, lungawi lohna lantirte pawh an awm. Gharmura bul hnai Krishnapur, Sahabad leh Ramnathpur khuaahte mipui an pungkhawm a ni.

July 27 chhûnlái velah Ramnathpur Police Station OC chuan, mipui pungkhawm chu an chêt vak palh chuan an venhim zawh loh mai a hlauh thu leh a hmaa beih an lo tawh tawh avangin, hmun him zawka inthiar fihlim rih a ṭhat a rin thu leh an haw duh a nih chuan ramri thlengin an vên (escort) theih tur thu a hrilh a ni.

Mizote chu haw turin an inbuatsaih nghal a, khaw en laia haw nghal mai tumin, chawhnu dar 2 velah an insiam zo tawh a, mahse, Ramnathpur OC chuan mipui pungkhawm an tam avangin zan lama chhuah a rawt a, chumi ang chuan zanah an chhuak ta zawk a ni. Gharmura aṭanga hawte chu Kaisanary-a awmte'n an lo zui nghal bawk.

Hetih lai hian, Gharmura khaw chhung tho, Mission compound aṭanga km. 2/1 vela hláa awm evangelist MC Lalthlanmawia te chhungkua erawh chuan Assam police escort an nang hman lo a, police venhimna hnuaia kal zui chu a him loa an hriat avangin lettir an ni thung a; hmun him zawk - Hrangkhawl hote zingah an awm rih tih SMB Secretary chuan a sawi.

Rev. Lalrinsanga chuan, Assam police-te'n theihtawpin an veng tih sawiin, "Zophai kawng diaka kan missionary-te motor táng pawh nawr chhuahsakin, an khalh chhuahsak a, ramriah pawh lawmthu sawi mawlh mawlh chungin hlim takin kan inthlah a ni," a ti.

Ramnathpur PS-ah police an tlem tih sawiin Rev. Lalrinsanga chuan, "Mipui an pungkhawm chak si a, inven zawh loh hlauhthawnna vanga rawn hawtir kan ni ber. Mipuiin min ûm haw lo a, keimahni'n kan hlauh vanga buaina rawn tlanchhiatsan kan ni lo bawk a. Assam mipui hian a páwng a puiin min khawih an tum lo a, an lusûn lai an nih avangin mipui rilru kal sual thei lakah police-te'n min hlauhthawnpui mai zawk a ni," a ti a; Mizorama hnam dang pawisawi lo chunga kutthlak lo turin mipui a ngen a ni.