Mizoramah thil man tihto a nih loh nan FCSCA leh DC-te'n thupek an chhuah
July 26, 2021 Vairengte dâi, state ramri bula buaina a chhuah hnuah Assam mite'n Mizoram luhka zawng zawng an dangchat a; hei vang hian Mizoramah mipui mamawh hrang hrangte chhehrelh leh tihto a nih loh nan Supply department leh district hrang hranga bawrhsapte'n thupek an chhuah.
Food, Civil Supplies & Consumer Affairs (FCSCA) director Ramdinliani chuan July 27, Thawhlehni khan hriattirna chhuahin, ni tin mamawhte chu hun eng emawti chhung a khaihlak theih avangin sumdawng, dawrkai, thlai leh thei zuartute chu an thil zawrhte chheprelh lo tur leh a man pangngai aia toa hralh lo turin an inhriattir a ni.
FCSCA Director chuan, hriattirna zâwm loa thupek palzût man chhuahte chu Legal Metrology Act, 2009 leh Prevention of Blackmarketing & Supplies of Essential Commodities Act, 1980 hmanga hrem an nih tur thu a tarlang a; "Kan ni tin mamawhte to uchuak taka zuar ṭhinte'n mipui dikna leh chanvo an palzút a ni tih hriain, consumer kan nihna anga kan dikna leh chanvote dan hmanga humhalh a nih theih nan mipuite'n kan awmna district-a DC-te hnenah thlen ṭhin turin kan inhriattir a ni," a ti.
Bawrhsapte thupeka tarlante
1) Dawrkaite leh sumdawngte'n an thil zawrh an tito tur a ni lo.
2) Ni tin mamawhte chu mamawh tâwk bâk chhêk lo tur te, chheprelh lo tur te, mi dang tana harsatna siam zawnga inla khâwl lo tur te, mi dang zai ngai turtein mipui ngen leh hriattir an ni.
3) Thupekte chu mahni veng/khua ṭheuhah kengkawh a, ruahmanna siam turin task force-te leh khawtlang hruaitute ngen an ni.
Thil man tisang lo tur leh bungrua chheprelh lo tura inhriattirna chungchangah hian district ṭhenkhatah chuan bawrhsapte'n July 26 tlai khan thupek a chhuah nghal a, July 27-a thupek chhuah an awm bawk. Thupek zâwm lo leh bawhchhiate chu dan hmanga hrem an nih tur thu an tarlang a ni.
Lungleiah chuan July 27 tlai khan DC Conference Hall-ah Lunglei HPC vice chairman Lawmawma Tochhawng, MLA kaihhruaiin sorkar hotute an ṭhukhawm a; Lunglei DC Kulothungan A, SP Rex Zarzoliana Vanchhawng, 2nd MAP commandant Saidingliana, YMA Sub-Hqrs, MZP leh MSU hruaitute an tel.
Lawmawma Tochhawng chuan, ramria buaina chhuak avanga chî-âi lo tura mipui chahin, "Mahni mamawh tâwk aia tam inchhêk khawl lo tur leh dawrkai leh sumdawngte chu dawr bungrua chheprelh emaw, MRP aia to emawa hralh lo turin kan chah a, kan zinga cheng hnam dangte lakah dawhtheihna kan lantir a ṭul," a ti a; ramin hun harsa a tawh laiin sorkar, pawl leh mipui ṭanrual a pawimawh thu a sawi.
Kolasib district-ah chuan July 27 khan bungrua chhehrelh a nih loh nan leh thil man tihto a nih loh nan enfiahtu tur inspection team din a ni a; inspection team-ah chuan DCSO, Marketting Officer leh Legal Metrology inspector-te an tel a ni.