Inkah chhan chhui tur din ngei turin ZPM party-in sorkar laipui an phût

ZPM party chuan thuchhuah siamin, India ram chhunga state pahnih police-te ralthuam an neih ṭha ber ber hmanga an inkap chu thil zahthlak tak a nih thu an tarlang a; inkah chhan dik tak ṭan bik nei loa chhuitu tur judicial inquiry din ngei turin sorkar laipui an phût.

ZPM thuchhuah chuan, July 26, 2021-a Assam IGP kaihhruai Assam police 200 rualin ramri vengtu Central police force camp pahniha sipaite vau beta Mizoram an rûn chu thil mak a ni tih sawiin, "Assam state police paruk laiin an thih phah a, mi 40 aia tam an hliam kha a pawi tak zet a ni," a ti a; Mizoram police zingah pawh mi pathum an hliam thu a tarlang.

India union chhunga khua leh tui ve ve, state pahnih police-te an inkâp chu thil zahthlak tak a nih thu sawiin ZPM chuan, "Sorkar laipui hian a chhan dik tak a hre ngei tur a ni a, thu dik hre turin ṭan bik nei hauh loa chhui chiang tur judicial inquiry a din ngei tur a ni. Mawhphurtu dik tak chu a phu tâwk hremna pek ngei bawk tur a ni," an ti.

ZPM-in an tarlan leh an zawhnate
1. IGP meuh kaihhruai Assam police 200 rualte kha rálthuam rip tak kengin eng ti turin nge Mizoram state pana an kal? Ambulance leh prison van an rawn kente kha eng atana hman tur nge?
2. Nunna tam tak hlohna, kha thil kha tu rawt nge? IGP kha a rawttu a nih chuan hremna a tuar tur a ni. Tihtirtu an awm a nih chuan, a tírtu chuan hremna a tuar tur a ni dawn lo'm ni?
3. Assam-Mizoram hian ramri chungchangah ngaihdan inang lo an neih avangin, sorkar laipuiin state pahnih inkarah venghimtu sipai (central force) a dah thluah a. Central force-te chu Assam police-te'n vaubetin, awlsam taka an paltlang a nih si chuan, Assam police-te hian sorkar laipui an pawisa lo tihna a ni. Central armed force meuh vaubettu Assam police-te hi Central sorkar hian an chungah eng rorelna nge a pek dawn tih Mizoram mipuite'n kan lo thlir reng e.
4. Assam chief minister Himanta Biswas Sarma chuan, Mizoram state hnai ramrî-ah police commando 4,000 rual dah a nih tur thu a puang. Ramri buai chinfelna atana sipai commando tam tak dah hi sorkar laipuiin a pawmpui em tih hi Mizoramin hriat kan duh.