KHAWTHLIR

Thisen pe
Kolasib Electric Veng Branch YMA-a Vanapa Section chuan nimin khan District Hospital Blood Bank-ah thisen pek an huaihawt a, thisen unit 17 an pe a, petute mipa pakua leh hmeichhia pariat an ni.

Accreditation card
Lawngtlaia IPRO C Lalhruaitluanga chuan nimin khan Lawngtlai Press Club-ah Lawngtlaia accredited journalist pasarihte hnenah press accreditation card a hlân. Accreditation card hi March 2023 thleng dam tur a ni a; inhlanna inkhawmah hian Lawngtlai MJA member-te tan 'Journalist workshop' buatsaih nghal niin, IPRO C Lalhruaitluanga chu resource person a ni.

Chhawmdawlna pe
Aizawl DC Dr Lalhriatzuali Ralte chuan Aizawl district-a Covid-19 vanga harsatna tâwkte puih nan Aizawla veng 30 leh Sairang khuaa task force-te hnenah Chief Minister's Relief Fund for Covid-19 aṭangin July 27, Thawhlehni khan chhawmdawlna Rs. 20,000 ṭheuh a pe. Chhawmdawlna Covid-19 vei tamna khua leh vengte a nia thu dawn a ni.

Land lease inhlân
Higher Education Board vice chairman Dr Vanlalṭanpuia, MLA chuan nimin khan Mizoram University registrar Prof. Lalnundanga hnenah MZU Southern Campus, Lungleia dinna tur provisional certificate of land lease a hlân. Provisional land lease-a a lan danin, MZU Southern Campus chu Pûkpuia Mausep Hmunlui leh Saza tlangah din tur a ni a, ram zau zawng chu acre 344.58 a ni.

Delhi NSUI dem
National Students' Union of India (NSUI), Mizoram State chuan thuchhuah siamin, Assam police-te'n silai an hmehpuah hmasak avanga Mizoram police nena an inkah chungchangah NSUI, Delhi-te'n thu chiang hre loa Mizo mipui diriam leh deusawh taka thuchhuah an nei chu ná an tih thu an tarlang a, "Central-a kan hotute hi kan ram leh hnam himna tichhe zawnga thu an rawn nei a, an rawn inrawlh dawn a nih chuan NSUI, Mizoram chuan bàn vek kan inhuam a ni," an ti.