Chanmari - Ramhlun N' footpath siamtute Sum hmuh dan ringawt ngaihtuahah puh

Aizawl North-II bialtu MLA Dr Vanlalthlana chuan, a bial chhunga footpath siam hna thawktute'n MLA leh department ngenna zah duh loin sum an hmuh tam dan tur ringawt an ngaihtuah niin a sawi a, "Hna thawktute hi MNF party mi leh sate an ni," a ti. MLA hian nimin khan Whitestone Conference Hall-ah thuthar thehdarhtute a kâwm a ni.

Dr Vanlalthlana chuan, UDPA department-in NEDP 2018-19 aṭanga Aizawl City Non Motorised Transport Master Plan Scheme an siam hnuaiah cheng nuai 125.47 séngin Chanmari-Ramhlun North inkarah kea kalna (footpath) siam turin ruahmanna an siam thu a sawi a, "Chanmari-Ramhlun North hi area panga­ah ṭhen a ni a, mi paliin work order an hmu," tiin, footpath siamnaah thil fel lo awma a hriat thu leh mipuiah harsatna a thlen thu a sawi.

Footpath siamtu tur thlan nan tender koh a nih loh thu sawiin Vanlalthlana chuan, "Hetiang hna lian hi chu tender ngei tur a nih hmel a, restricted tender pawh koh a ni lo. Aizawl City Non Motorised Transport Master Plan Scheme hnuaiah hian cheng nuai 760.4 dah a ni a, hna dangah chuan tender ko ngei tawh turin UDPA Minister ka ngen a ni. He hna kalpui a nih hian parking chungchangah AMC-te hriattirna pek a ni lo hi pawi ka ti hle," a ti.

Aizawl North-II bialtu MLA Dr Vanlalthlana chuan, Chanmari-Ramhlun North footpath siam hna thawh mekah agreement amount awm mah se, an thawh chin zel aṭanga measurement lain bill siam a nih dawn thu a sawi.

Dr Vanlalthlana chuan, "An thawh chin zela pawisa dawng tur an nih avang hian bial chhung mipuite harsatna tur pawh ngaihtuah zo lo leh thil hmanhmawhthlak pawh ni loa sorkar sum hek zawnga hmalakna a awm hi a pawi hle a ni," a ti a; sorkar hnathawkte hlawh pûksak tum a nih laia party worker-te induhsakna kalpui chu mipuite'n hriat hrehawm an tih thu a sawi.

PAHOSS hnuaia parking siamna tur hmun hnihah footpath siamin, hand railing-te dah a nih thu sawiin Vanlal­thlana chuan, "PAHOSS hnuaia parking siam turte'n an siam hunah tihchhiat leh vek a ngai dawn a, sum sèn thlawnna mai a ni. Department lam leh keimah ngei pawhin ṭul lêm loa footpath siam an tumnaahte siam lo turin kan ti a, mahse, hnathawktute hian an thawh chin apianga an bill zel dawn avangin a thui thei ang ber siam an tum tlat a ni," a ti.

Aizawl North-II MLA chuan, sorkar­in inrenchemna a kalpui lai leh sorkar hnathawkte hlawh pawh a mamawh lêt tawh laia duhâm taka MNF party worker-te'n sorkar sum tihek zawnga hma an la chu a dem thu sawiin, "Sorkarin sum a mamawh em em laia party worker-te'n department lamin thawk tura an tih chin bâk pawh thawh zel an tum chuan, Covid-19 vanga MLA fund nuai 50 thawh kan rèl pawh ngaihtuah nawn leh a ngai mai thei," a ti a; Covid-19 vanga sum mamawhna a awm chuan MNF sorkar chu hma hruai tura a phût thu a sawi bawk.