Covid-19 hripui veite enkawlna Damdawi-ina khum luah khah vek a ni

Nimin khan Health minister Dr R Lalthangliana hoin Secretariat Conference Hall-ah dedicated covid hospital (DCH) - State Referral Hospital-in harsatna an tawh leh damlote enkawltu volunteer indaih lohna chungchang sawiho a ni. SRH-ZMC leh Aizawla hripui vei damlote enkawlna dedicated covid health centre (DCHC)-a khum a khah vek thu an sawi.

ZMC director Dr John Zohmingthanga chuan, Covid-19 thawh hnihnaah hripui vei damlo enkawl ngai an pun nasat avangin thawktu, a bikin nurse-ah indaih lohna a nasat thu leh, naupang enkawlna tur ward peih a nih chuan nurse lâk belh a ngaih dawn thu a sawi a; thawktu dangah pawh an indaih loh thu a sawi a ni.

Dr John Zohmingthanga tarlan danin, June thla khan SRH-ZMC-ah nau piang 35 awmin, an zinga 15 chu enkawl zui uluk ngai (neo-natal care) an ni a; July thla kal mekah nimin thleng khan nau piang 50 an awm a, an zinga 30 chu enkawl zui uluk ngai an ni.

ZMC Director chuan, Covid-19 thawh thumna atan an inbuatsaih a, hripui vei naupangte enkawlna tur bik HDC/NICU/SICU atan theihtawpa an inbuatsaih thu a sawi a; LG company-in an pek air conditioner an bun thu leh TATA Trust aṭangin oxygen pipeline siamna tur leh thil pawimawh dang tihna tur an hmu dawn tih a sawi bawk.

Dr John Zohmingthanga sawi danin, niminah khan SRH-ZMC-ah ward pangngai leh ICU-ah damlo 310 enkawl mek an awm a, an zinga awmpuitu mamawh mi 82 awmin, nau piang hlim 12-te nen an vai hian mi 404 an awm. Damlo na lutuk lo, enkawl uluk ngai site dahna tur ruahman DCHC - MRB building-a khum 50 pawh a khat vek a ni.

Meeting-a tarlan danin, district tina DCHC leh Aizawla DCHC thar pahnih ruahman mek Kulikawn Hospital leh Mualpuia Sports Council building-ah thawktu chi hrang hrang - specialist doctor leh doctor dang te, nurse, laboratory technician leh thawktu dang, a vaiin a tlem berah mi 220 vel mamawh belh a ni dawn. Mamawhte chu a ṭul anga sorkar thlen dan tur an ngaihtuah a ni.