Chhungkaw 9,750 ṭanpui dawn

Committee on Utili­zation of Chief Minister’s Relief Fund for COVID-19 ruahmanna angin, Aizawl khawpui chhunga lock­down vanga harsatna tâwk chhungkaw 9,750 leh mi pariat chhawm­dawlna atan nimin khan CMRF for COVID-19 aṭangin Rs. 1,46,41,000 pek chhuah a ni.

Chief Minister's Office-in sanction order a tihchhuaha a lan danin, AMC huam chhunga chhungkaw 9,750 hnen­ah chhawmdawlna Rs. 1,500 ṭheuh pek a ni dawn a, chuta tana sum pek chhuah zat chu Rs. 1,46,25,000 a ni. Aizawl khawlaia záia ṭanpuina dil ṭhin mi pariat hnenah Rs. 2,000 ṭheuh pek a ni dawn bawk a, chuta tana sum pek chhuah chu Rs. 16,000 a ni.

Chief Minister's Relief Fund for COVID-19 ah hian nikum aṭanga nimin thleng khan Rs. 29,21,32,678 a lut tawh a, chu'ng zinga Rs. 26,77,55,470 chu hman tawh niin, hman loh Rs. 2,43,77,208 a la awm.