Fimkhur turin police-in mipui an chah

Mizoram Police chuan thuchhuah siamin, tunlaiin internet kaltlanga pawikhawihna a hluar thu an tarlang a; fimkhur zual turin mi tin an ngen.

Nimina Police thuchhuah chuan, Covid-19 léng avang leh lockdown avangin Mizoramah internet kaltlanga pawikhawihna a hluar tih tarlangin, "Hri léng hian kan nunphung a tihdanglam dâwrh avangin mi tam takin mamawh lak khawm nan leh inawm tlei nan social media hrang hrang kan hmang nasa hle. Hei hian internet kaltlanga mi bum leh rawk chíngte chêtna a tipung a, rûkrûk leh misualte chet dan a thlak nasa hle a ni," an ti.

Police tarlan danin, Cyber Crime Police Station-ah January - June 2021 chhungin internet kaltlanga pawikhawihna chungchangah FIR 267 a lut a, kum 2020 chhunga lut zat 163 aiin 104 (60%)-in a tam zawk. FIR thehluh zinga 71% chu internet kaltlanga sum leh paia inbumna kaihhnawih a ni a, 17% chu internet kaltlanga mipat mipatna hawi zawnga inbumna leh inthlêmna niin, 12% chu mimal nihna inrûksak, Facebook kaltlanga mipat hmeichhiatna hmanpuia insawm hnua intihmualpho tuma invauna leh copyright dan bawhchhiatnate a ni.

Mizoram Police chuan, internet kaltlanga sualna pung zel laka fimkhur zual turin mi tin an ngen a, "Mimal information - pian ni leh thla, internet banking password leh one time password-te tu mah hrilh loh tur a ni," an ti.