Chennai aṭanga haw Kolasib district mi leh sate'n Covid-19 an kai lo

May 15, 2020-a Chen­nai aṭanga rél hmang­a Mizorama rawn haw Kolasib district mi leh sate chu Reverse Trans­criptase Polymerase Chain Reaction (RT-PCR) hmang­in an swab sample endik vek a ni tawh a, Covid-19 hripui kai an awm lo.

Kolasib aṭanga Vang­laini thu dawn danin, Chen­nai aṭanga rawn haw Kolasib district mi 44-te chu quarantine centre aṭanga an chhuah hmain RTCPR hmangin swab sample endik vek a ni a, hripui an kai lo vek tih finfiah a ni.

Chennai aṭang hian Chennai, Vellore leh Puducherry-a tangkhang mi 884-te rél hmangin an rawn haw a, khawsik enna (infrared thermometer) hmanga endik an ni. Chumi hnuah quarantine-na tur hmun panpui an ni.

Hetih lai hian, Chennai-a Covid-19 vei tamna (red zone)-a awm mi 54 chu rapid antibody test (RAT) hmanga endik an ni a, mi pakhat bak rinhlelhawm (RAT reactive) an awm lo. RAT reactive pawh hi RTCPR hmanga endik hnuah Covid-19 a kai lo tih hmuh a ni.

Chennai aṭanga rawn hawte hi Aizawl district mi 346, Lunglei district mi 50, Champhai district mi 69, Serchhip district mi 34, Kolasib district mi 44, Siaha district mi 136, Lawngtlai district mi 46, Mamit district mi 82, Saitual district mi 37, Khawzawl district mi 20 leh Hnahthial district mi 20 an ni.

Quarantine centre-a an awm hun chhung ni 14 chu May 29 khan a zo tawh a; hriat theih chinah Kolasib district chiah hi Chennai aṭanga rawn haw quarantine centre-a an awm laia RTCPR hmanga endik vek an ni.