COVID-19 vangin Mizoram chhunga Zirna-inte vawiin aṭangin khar dawn

Tunlaia hri léng mek Coronavirus (COVID-19) laka Mizo mipui an him zawk theihna turin Mizoram sorkar chuan Mizorama zirna-in zawng zawng chu vawiin aṭangin March thla chhung zawng a khâr dawn. He thutlukna hian exam nei mekte erawh a huam lo.

Nimin khan Health minister Dr R Lalthangliana hoin Health & Family Welfare Board vice chairman Dr ZR Thiamsanga, chief secretary Lalnunmawia Chuaungo leh department hrang hrang aiawhte an ṭhukhawm a; vawiin (March 17) aṭangin March thla chhung zawng Mizorama zirna-in zawng zawng khâr turin thutlukna an siam. Zirna-in bakah, swimming pool, gym, cinema hall leh picnic spot-te khâr rih tura rêl a ni bawk.

Dr R Lalthangliana chuan, COVID-19 laka Mizo mipui an him theihna tura sorkar hmalak danah duhthusam tâwk lo a awm theih thu sawiin, "Theihtawp erawh kan chhuah. Kan resource neih loh ngaihtuahin kan thawk ṭha hle. Chief Secretary kaihhruai State Level Task Force on Mitigation of Coronavirus (COVID-19)-te'n ngaihtuahna an séng nasa a, an fakawm hle. An hmalakna kan sâwtpui khawp mai," a ti. Mizoram University (MZU) hotute'n zirna-in khâr chungchangah March 14, 2020 khan amah an biak thu sawiin R Lalthangliana chuan, "MZU hotute hian UGC lam aṭangin university-te khâr a ṭha lo maw tiin thuràwn an dawng a, state ngaihdan min zâwt a ni. Hemi bawhzui hian Pathianni ni mah se, March 15 khan Aizawla college principal leh MZU hotute meeting kan neihpui a, college khâr vanga harsatna awm thei turte kan sawiho a ni," a ti a; principal ṭhenkhatin harsatna awm thei tura an ngaihte chu chinfel theih nia a hriat thu a sawi.

Chief secretary Lalnunmawia Chuaungo chuan, Mizoramin COVID-19 a hmachhawn dan chhuan­awma a hriat thu sawiin, "Screening leh awareness-te kan ti nasa a, social media-a thudik lo thehdarhtute chu police-te'n a ni la lain an man nghal thei a ni. Sorkar agency hrang hrang, YMA, kohhran leh private hospital-te nen thawhhona a ṭha a, a lawmawm tak zet a ni," a ti. Lalnunmawia Chuaungo chuan, biak-ina inkhawm chu in­ṭhulh­tir chi a nih loh thu sawiin, "Inkhawm hi awareness campaign tihna atan hmang ila tih rilruah a awm. Mizoram Kohhran Hruaitute Committee-te kaltlangin Pathianni lo awm tura chawhma inkhawmah COVID-19 awareness campaign nei turin kohhran tinte ngen tum a ni," a ti a; sorkar office pawh khâr chi a nih loh avangin tlawhtu leh thawktu ngah deuhah chuan screening neih dan ngaihtuahnaah an neih thu a sawi.

Zirna-in khâr tur hian exam nei mek leh residential school-te a huam lo a, college hrang hrang, CBSE course zawm sikul te, anganwadi-te leh pre-school-te a huam thung. Mizoram sorkar hnuaia primary school aṭanga higher secondary school-te erawh an chawlh lai a ni thung. MZU bik chu vawiin aṭanga April 3, 2020 thleng khâr tur a ni ang. Nimina meeting chuan, home hrang hrangte dinhmun tur an ngaihtuah a, chhuahtir ngawt chi a nih loh avangin tlawhpawh phal loh turin thutlukna an siam. Meeting-a rel dan chuan, zirna-in, swimming pool, gym, cinema hall leh picnic spot-te chu March thla chhung khâr tura tih a ni phawt a, chumi hnuah boruak awm dan azirin ngaihtuah ṭhat leh a ni ang.