Road Safety Week hawng

Road Safety Week vawi 31-na chu nimin khan Mizoram hmun hrang hrangah hawn a ni a; Aizawlah chuan Transport minister TJ Lalnuntluanga'n a pisaah a hawng.

TJ Lalnuntluanga chuan, kum danga lian tham taka Road Safety Week hawnna programme hman ṭhin chu COVID-19 laka mipui him nan leh sorkar duh dan angin puipunna lian huaihawt loin Transport department officer-te nen a hawnna hun a pisaah buatsaih a nih thu a sawi.

Transport Minister chuan, dan zawm chu himna a nih thu sawiin, "Lirthei khalhtu te, lirthei neitute leh mipui mimirin lirthei kaihhnawiha sorkarin dan a siamte an zawm a pawimawh. Kum khat chhungin India ramah lirthei chetsual vanga thi mi 1,50,000 chuang an awm. Lirthei khalh fimkhur loh vanga kum tina chhiatna rapthlak tak tak thleng ṭhin hi dan zawmin tam tak pumpelh theih a ni," a ti.

Mipui rilru sûkthlêk dan siamṭhat pawi­mawhzia sawiin TJ Lalnuntluanga chuan, "Thil ti thei nih duh vanga dan zawm famkim loa thil tih tum bànsan a ṭul," a ti a; khua leh tui ṭha chuan sorkarin dan leh kaihhruaina a siamte an zâwm tur a nih thu a sawi. Road Safety Week hian March 22 thleng a awh dawn a, thupui chu 'Dan zawm hi himna a ni' tih a ni.