KHAWTHLIR

New Delhi leh Mizoram inkara tangkhang phur tur thlawhna a bika ruahman Indigo Airlines, June 6, Inrinnia thlâwk tura tih chu Directorate General of Civil Aviation aṭanga thu thar hmuh angin June 7, Pathianniah sawn a ni. Sorkar thuchhuah tarlan danin, naktuk chawhma dar 11-ah Lengpui Airport thleng tura beisei a ni a, chhun dar 12-ah New Delhi panin a thlawk chhuak leh ang. Delhi pana a lêt leh lama chuang duh tan Principal Consultant’s Office, Civil Aviation Wing-ah ticket ngaihven theih a ni a, seat 100 a awm.

Committee on Utilization of Chief Minister’s Relief Fund for Covid-19 chuan nimin khan CM Relief Fund aṭangin Mizoram páwna Mizo fellowship/association pali hnenah Rs. 5,50,600 a pe chhuak leh. Nimin tlai dar 4 thleng khan Covid-19 dona atana CM Relief fund-ah sum thawh khawm chu Rs. 8,04,05,207 a ni a, Rs. 6,20,52,560 hman tawh niin, hman loh Rs. 1,83,­52,647 a la awm a ni.

Mizo Students' Union chuan, kumin April leh May thla chhunga sikula fee lak chung­changa sorkar leh private sikulte'n inremna an lo siam tawh zâwm lo private school an awm ngeia hriat a nih thu an tarlang a; school fee lak tur aia tam late chu MSU hruaitute hnenah fee pek­na slip nen June 8, 2020 chhun dar 12 hmaa inhriattir turin an ngen. MSU-in inhriattirna tur phone number an tarlante chu Samuel Zoramthanpuia 8014146640, Lalthawhsaka Fanai 9612579380 leh Lalhmangzuala 9402145541-te a ni.

Siaha district bawrhsap Bhupesh Chaudhary chuan, Covid-19 donaa a ṭul anga an district chhunga hman turin DC Relief Fund a siam a, chutah chuan nimin thleng khan mimal, pawl leh kohhran hrang hrangte'n Rs. 7,68,000 an chhûng lut tawh.

Minister Lalchamliana chuan nimin khan a bial, Hrangturzo constituency chhunga zirlai, HSLC 2020-a ti ṭhate leh sikul zinga result nei ṭha­te hnenah lawmpuina pawisa leh thuziak a hlân. Covid-19 vanga zin veivah a rem loh avangin lawmpuinate chu a pisa aṭangin a dawngtu turte hnenah a thawn a ni.