DAY-NULM-ah home/centre 81 tan Rs. 5,12,48,406 sem a ni tawh
UDPA department chuan Deendayal Antyodaya Yojana - National Urban Livelihoods Mission (DAY-NULM) aṭangin khawpuia chêng, kohhran leh pawlin chanhaite tana an din home leh centre hnenah Rs. 5,12,48,406 an pe chhuak tawh.
Vanglaini-in RTI Act hmanga a zawhna UDPA department SPIO-in a chhàn danin, sorkar laipui scheme DAY-NULM (Scheme of Shelter for Urban Homeless) hi Mizoramah chuan kum 2014-15 aṭangin kalpui a ni a; a tum chu - khawpuia chêng zingah kawtthlera riah ngai khawpa harsate riahna tur hmun him leh ṭha buatsaihna a ni.
DAY-NULM hnuaiah hian district pakua atana Rs. 5,12,48,406 pek chhuah a ni tawh a, sumte chu in sakna, in chhung bungrua, pisa sakna, step siam, CCTV bun, tui mamawh siamna leh mamawh dangahte hman ṭhin a ni.
Ṭum khata pek tam ber chu Dharamshala, Falkawn a ni a, new construction hnuaiah Rs. 50,00,000 pek a ni. Cheng nuai 20-30 inkar pek an awm nual a, sing bîa pek an awm bawk.
Mizoramah chuan ṭanpuina chi thum ruahman a ni. 'News construction' tih hnuaiah chenna hmun thar sak ṭhin a ni a, sum chu ram leina atan hman phal a nih loh avangin sorkar leh NGO-te ram chhungah sak a ni ṭhin. 'Refurbishment' tih hmangin home/centre-ah hmanrua leh mamawh (facility) hrang hrang pek a ni. 'Operation & Management Fund hmangin de-addiction centre leh old age home-a chengte zinga thi, home/centre-in ruang an hlâwm ngaite chu urban homeless-ah chhiar niin, chutiang atan chuan mi pakhat zelah home/centre puih nan kum khatah Rs. 12,000 pêk a ni ṭhin.
Heng bakah hian, new construction fund hmanga chênna thar sakte hnenah sak zawh hnua khum awm thei zat milin Operation & Management fund pek ṭhin a ni bawk a; shelter/home hnenah a záwnin kum nga aia rei pek phal a ni lo thung.