ZMC Covid-19 lab. kalphung sawifiah
Zoram Medical College (ZMC)-a Microbiology department chuan SRH-ZMC Bulletin hmangin ZMC Covid-19 testing laboratory chungchang an sawifiah a; swab sample endiknaah an endiknate a fuh tâwk em tih endik nan control (positive leh negative) dah tel ziah tur a ni a, chumi tel lo chuan endik theih a nih loh thu an tarlang.
An tarlan danin, Covid-19 a len ṭan tirh laiin Mizoramin endikna laboratory a la nei lo a, Kolkata-a NICED, Guwahati Medical College leh Silchar Medical Centre-ahte sample thawn a ni ṭhin. Mizoramah Covid-19 endik a nih theihna turin Indian Council of Medical Research (ICMR) thuràwn la chungin sorkarin hma a la a, ZMC-in hmanrua a neih lohte chu Mizoram chhung hmun dang aṭanga hawh khawmin laboratory chu din a ni.
ZMC Covid-19 laboratory chu a hmunhma leh ṭul dangte endik vek a nih hnuah sample endik phalna (license) chu April 4, 2020 khan National Institute of Virology (NIV), Pune-in a pe a; tihchhinnate hlawhtling taka tih a nih hnuah April 7 aṭangin swab sample an endik ṭan a ni.
ICMR-in swab sample endiktu tur chu Covid-19 testing laboratory-a training neite chauh a pawm avangin ZMC Microbiology department-a doctor-te leh laboratory technician-te chu Silchar Medical College-ah VDRL lab-ah training turin ṭum hnih tirh an ni a; chu'ng mite chuan ṭha takin training an zo.
RTPCR endikna reagents (ICMR approved) leh nitin test-na atana mamawh chu sorkarin a lei a, screening assay leh confirmatory assay-te erawh chu ICMR-in NIV, Pune-a a endikte chauh India rama Covid-19 laboratory-ah hman turin a sem ṭhin a, ZMC laboratory pawh NIV, Pune pawmpui a nih angin a thlawnin an dawng ṭhin.
Swab sample test-naah endiknate a fuh tâwk em tih endik nan control (positive leh negative) dah tel ziah tur a ni a, chumi tel lo chuan test theih a ni lo.
Control (endiktu)-te hian sample lak dan a dik tâwk em tih leh, endik dan kalphung (procedure) a tàwp thlengin a dik leh dik loh an endikpui zel a ni. Endik zawh veleh report-te chu ICMR-ah thawn zel a ngai a, ICMR chuan kawng engkimah a vil zui reng a ni.