COVID-19: MIZORAM DINHMUN Hripui vei 1,100 hmuh belh a ni

July 28, Nilaini khan Mizoramah Covid-19 vei mi 1,100 hmuh chhuah a ni a, July thla chhungin mi 15,905 hmuh chhuah ni tawhin, ni khata hmuh zat chawhrual chu mi 568.04 a ni. Nimin khan hripui laka fihlim tawh mi 246 chhuahtir an ni thung.

Covid-19 vei hmuh tharte chu mipa 542 leh hmeichhia 558 an ni a; ZMC laboratory-a hmuh chhuah 259, TrueNAT-PCR hmanga hmuh 55 leh Rapid Antigen Test hmanga hmuh 786 an ni.

Hripui vei hmuh thar 1,100-te chu natna lang chhuak 486 leh lang lo 614 an ni a; tualchhunga kái 1,096 leh state páwn aṭanga tun hnaia rawn lut pali niin, tualchhunga kái zingah kàina chin hriat loh mi 510 an awm. Nimin zing khan enkawl mek mi 11,600 an awm a, an tam lai ber a thleng zui zel.

IDSP record angin, Mizoramah Covid-19 vei mi 36,397 hmuh chhuah a ni tawh a, mipa 19,410 leh hmeichhia 17,017 an ni. Nimin tlai dar 5 thleng khan mi 24,903 (68.42%) chhuahtir an ni tawh a, mi 140 (0.38%) thi tawhin, enkawl mek mi 11,354 (31.20%) an awm.

July 28, Nilainia swab sample endik dan chu - ZMC laboratory-ah Aizawl leh Serchhip district-a mi 1,950, TrueNAT hmangin district 10-ah 376 leh RAT hmangin district 11-ah 4,906 a ni a, a vaiin sample 7,232 (mipa 3,701 leh hmeichhia 3,531) niin, chu'ng aṭanga hripui vei hmuh chhuah 1,100 chu 15.21% a tling. Positive percentage hi ZMC-ah 13.28%, TrueNAT-ah 14.62% leh RAT-ah 16.02% a ni.

Nilainia district-a Covid-19 positive hmuh dan chu - Aizawlah mi 819, Kolasib-ah 79, Lungleiah 68, Siahaah 35, Champhaiah 32, Mamitah 30, Lawngtlaiah 24 leh Serchhipah mi 13 an ni. Mi 1,100-te chu Aizawla veng 67 leh khaw dang 40-a mite an ni a; Lunglei leh Kolasib khawpuia veng 10 ve ve leh Lawngtlai khawpuia veng paruka mite an tel.

Hripui vei hmuh thar mi 1,100 zingah naupang kum tling lo 270 vel awmin, an zingah symptom nei 120 vel an awm a; nausen kum khat tling lo 13 awmin, a naupang ber chu thla khata upa a ni. Kum 60 chung lam 80 chuang awmin, an zingah symptom nei an awm nual a; a upa ber chu kum 87 mi a ni.

ZMC-a hmuh chhuah mi 259-te chu tualchhunga kái leh hri vei tawh nena inhnaihna nei deuh vek an ni a, kàina hriat loh pariat leh symptom nei pakua an awm.

TrueNAT hmanga hmuh mi 66-te pawh tualchhunga kái deuh vek niin, kaina hriat loh paruk an tel a, symptom nei pakua an awm a ni. RAT hmanga hmuh chhuah mi 786-te chu tualchhunga kái vek an ni a, an zinga mi 496 chu an kàina chin hriat a ni lo.

Nimin khan tlai dar 5 thlengin hripui laka fihlim tawh mi 246 chhuahtir an ni a; Aizawl district-ah mi 103, Kolasib district-ah 52, Mamit district-ah 33, Champhai district-ah 21, Siaha district-ah 16, Lawngtlai district-ah 12, Lunglei district-ah pasarih leh Hnahthial district-ah mi pahnih an chhuak a ni.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 9,646 hmuh chhuah a ni tawh a, TrueNAT-PCR hmangin 2,218, RAT hmangin 24,532 leh Guwahati-ah pakhat hmuh chhuah a ni tawh.

IDSP tarlan danin, July 28, 2021 thlengin Mizoramah swab sample 6,10,514 endik a ni tawh a, chu'ng aṭanga Covid-19 vei hmuh tawh zat 36,397 chu 5.96% a ni. Hripui vei hmuh tawh zinga mi 32,201 chu Mizoram chhunga kái chhâwng an ni a, mi 4,194 chu Mizoram páwn aṭanga an rawn luh hnua hmuh chhuah an ni.