Governor leh MZU hotute inkâwm

Governor Dr Haribabu Kambhampati chuan nimin khan Raj Bhavan-ah Mizoram University pro-vice chancellor Prof. JK Patnaik leh registrar Prof. Lalnundanga te a kâwm. Governor hi MZU chief rector a ni.

Larsap Dr Haribabu Kambhampati chuan, eizawnna atana thiamna ṭangkai zirna lam hawi, professional course hrang hrang te, skill develop­ment lam te, hotel & hospitality management lamahte ṭan la turin MZU hotute chu a chah.

Governor chuan, hmar­­chhak ṭhalaite chu an taima hlea a hriat thu leh India ram hmun hrang hranga hotel lian leh company lianahte hmarchhak ṭhalai tam tak an thawh thu a sawi a, "Company-te'n mi taima leh hna thiam an duh a, chutiang mi chu Mizoramah pawh kan chher chhuah chuan company tam takin campus interview neih inchuhin ṭhalaite an rawn thlêm dawn a ni," a ti.

MZU hotute chuan, MZU din dan te, a hma­sawnna leh hlawhtlinna te, hmachhawp awm mekte Governor Kambhampati an hrilh a; MZU chu India rama university hriat hlawh zinga mi a nih tawh thu te, Mizoram chhim lam bial tan Southern Campus dinna tur ram Mizoram sorkarin a pek tawh thute an sawi bawk.