Ramri buaina chingfel thuai turin BJP Presi-dent-in Amit Shah ngen

BJP, Mizoram Pradesh president Vanlalhmuaka chuan nimin khan Home minister Amit Shah hnenah lehkha a thawn a, state ramri kaihhnawiha Mizoram leh Assam inkara buaina awm chu a rang thei ang bera chinfel a nih theih nan hma la turin a ngen.

Vanlalhmuaka chuan, state ramri buai avanga July 26, 2021-a Vairengte dáia buaina chhuakah thi leh hliam an awm chu pawi a tih thu sawiin, "Hliamte leh mitthi chhungte kan tawrhpui tak zet a ni. Hetiang thil duhawm lo hi a thlen leh tawh ngai lohna tura a rang thei anga hnam nunphung leh thil kal tawhte en chunga Mizoram-Assam ramri hi a rang thei ang bera chingfel thuai turin ngenna ka rawn thlen a ni," a ti.

Mizoram leh hmar­chhak state ṭhenkhatah Covid-19 nasa taka a lêng vanga state sorkar leh mipuite thil dang buaipui hleithei loa an awm lai a nih thu tarlangin Vanlalhmuaka chuan, "Assam-Mizoram ramri, status quo kenkawhna tur hmunah Assam sorkarin armed police-te a tíra Mizo ṭhenkhatte huan thlai tichhe zawng leh remna leh muanna tichhe zawnga hma an rawn la hi a pawi hle a ni," a ti a; India rama state rálmuang ber - Mizoramah buaina a thlen leh tawh loh nan ramri buai chingfel turin Union Home Minister a ngen a ni.

Mizoram BJP President chuan, Assam Chief Minister-in July, 27, 2021-a thuthar thehdarhtute a kawmnaah, Assam-Mizoram ramri velah commando 4,000 an dah tur thu a sawi chu pawi a tih thu ziakin, "Min barakhaih hle a ni," a ti. Kum 1966-a Mizote'n zalenna an sual chhan chu mautàm ṭam laia Assam-a Congress Chief Minister-in Mizote tham lo tak leh diriam taka a enkawl vang a nih thu tarlangin, "Assam CM-in China emaw, Pakistan emaw bei tur ni awm taka Assam-Mizoram border-ah commando 4,000 ka dah ang, a ti hi BJP CM ṭawngka ni theiah ka ngai lo a, a zahthlak ka ti tak zet a ni," a ti.

PM Narendra Modi kaihhruaina hnuaiah India mipuite 'Sabke Sath, Sabke Vikas and Sabke Viswas' (Mi tin thawhhona, hmasawnna, inrin tawnna) atan an kal laia state ramri buai avanga India ram hmélhem tur chu an ngaingam lo tih a ziak a, "Ramri buai hi a rang lama chinfel ngei kan duh a ni," a ti a; Prime Minister kaihhruaina hnuaia hmalaknate chu an thlàwp tlat thu a ziak bawk.
Vanlalhmuaka chuan, ramri kaihhnawih reng rengah Mizoram sorkar hmalakna theihtawp chhuaha thawhpui an intiam tih tarlangin, "Kan theihna kawng hrang hrangah na takin hma kan la zel dawn a ni," a ti.