MZU Southern Campus dinna turin MHRD-ah vbc. 300 hù DPR thehlut

Higher & Technical Educa­tion Board vice chairman Dr Vanlalṭanpuia, MLA chuan, Lungleia Mizoram University Southern Campus dinna turin July 28, Nilaini khan Ministry of Human Resource Development (MHRD)-ah cheng vbc. 300 hù detailed project report (DPR) an thehluh thu a sawi.

Thuthar thehdarhtu ṭhenkhatin an kawmnaah Dr Vanlalṭanpuia chuan, Lunglei Pûkpui rama MZU Southern Campus dinna tur ram, temporary land lease chu July 28, 2021 khan MZU thuneitute hnenah a hlan thu a sawi a, "MZU Southern Campus atan hian Pûkpui khawtlangin Mausep hmunah a thlàwnin ram an pe a, acre 344.58 laia zau a ni," a ti.

Dr Vanlalṭanpuia chuan, MZU Southern Campus dinna turin MHRD-ah July 28 khan DPR thehluh a nih thu sawiin, "Kan lehkha pawimawhte chu Central Finance-ah a awm mek. Chief Minister pawhin DPR hi ṭha min tihpui a, DO letter a thawn tur pawh buaipui mek a ni," a ti a; Southern campus a hlawhtlin theihna tura hma latu CM Zoramthanga, HTE minister Dr R Lalthangliana, Pukpui khawtlang, MZU leh Revenue department-te hmalakna chu lawmawm a tih thu a sawi.

HTE Board Vice Chairman sawi danin, MZU Southern Campus din a nih theih nan kum 2006 velah Lungleia páwl hrang hrangin hma an la ṭan a, sorkar pawhin a bawhzui ṭhin. MHRD hotute chuan MZU Southern Campus hawn a thuphunga an pawmna lehkha chu January 17, 2020 khan HTE minister Dr R Lalthangliana hnenah an pe a ni. A hmun tur chu a thlàwna neih a ngai a, Mizoram sorkar hmalakna angin Pukpui khawtlangin an pe a, Revenue lamin an bawhzui a ni.

Vanglaini palai zawhna chhangin Dr Vanlalṭanpuia chuan, Lunglei Pukpui ram thoa Mizoram Engineering College (MEC) tur sak zawh tawh chu MZU Southern Campus atan hman lailâwk tumna a awm thu a sawi.

Cheng vbc. 26 vel séngin MEC building turte sak zawh tawh ni mah se, a panna kawng km. 2.7 vela thui siam, tui leh kawlphetha peknate siam a la ngaih avangin chuta tan chuan Mizoram sorkarin cheng vbc. 11 vel hû DPR a siam thu a sawi a; sum lama state sorkar harsat lai a nih avangin hmalak a harsat rih thu a sawi bawk.