Deputy CM hoin Mizoram chanchin state páwna thehdarh dan tur sawiho

Nimin khan deputy chief minister Tawnluia hoin a pisaah Mizoram chanchin state páwna puan chhuah leh thehdarh dan tura kalphung ṭha zawk sawiho a ni a; IPR minister Lalruatkima leh phai lam media-a thawk Mizo journalist-te an tel.

Deputy Chief Minister chuan, Mizorama thil thlengte state páwna media hrang hrangte'n thil thlen dan dik tak an hriat chian a pawimawh thu sawiin, chuta tana hmanraw pawimawh ber chu national media-a thawk (correspondent)-te an nih thu a sawi a, "Kan dikna leh thiam kan channa Mizoram chhunga kan hriat ringawt hi a tâwk lo a, khawvel hriata kan au chhuahpui a ngai," a ti.

Deputy CM Tawnluia chuan jounalist-te zawhna chhángin, ramri chungchangah sorkarin ngaihdan nghet tak a nei tih a sawi a, "Tuna kan dinna ngai aṭanga tawlh kîr kan tum lo. Ramri buaina chinfel a nih theih nan sorkarin Boundary Committee a din a, chu chuan hma chak takin a la chhunzawm zel dawn a ni," a ti.

Tawnluia chuan, tun hnaia Vairengte dáia thil thleng ang ni lo, hun pangngaiah pawh uar lehzual in national news-ah Mizoram hmél a lan tam theih nan ṭan lak a ṭul thu sawiin, chumi atan chuan rawtnate siam turin journalist-te a ngen a ni.

IPR minister Lalruatkima chuan, Mizoram leh Assam inrìnaa buaina thleng mekah media lama inbeihna nasa takin a thleng tih sawiin, "National media-a thawk Mizo journalist-te hi kan hmachhuan in ni," a ti a; taima tak leh uar taka Mizoram dinhmun dik tak puangzar turin a fuih.