DC-in ramri tlawh tam lo turin a ngen

Kolasib bawrhsap Dr H Lalthlangliana chuan, July 26, 2021-a Vairengte dáia Mizoram police leh Assam police innawr chungchang leh ramria invenhimna kalpui danah nimin khan thuthar thehdarhtute a kâwm a; ramri venhim hna ṭha zawka kalpui a nih theih nan police duty-te tlawh tam rih lo turin mi tin a ngen.

Vairengtea silai hmeh puah chungchangah Dr H Lalthlangliana chuan, Assam police-te'n ti lo thei lo dinhmuna an nawr luh vang a nih thu a sawi a; thil thleng vanga thi leh hliam an awm chu pawi a tih thu sawiin, "Chan ṭha zawk chang kan ni a nih pawhin, nunna hial chànna thil thleng hi chapopui lo a, mitthi chhungte ngaihtuah tel chunga kan chêt zia leh ṭawngkaah inngaihtlawmna leh lainatna tihlan a pawimawh," a ti.

Ramria buaina a nih avangin inpuahchahna ṭha zawka kalpui hun lai tak a nih thu sawiin H Lalthlangliana chuan, "Tawlh lêt kan tum lo. Kan police-te huaisenzia hi ram pum hriatah pho lan mek a ni a, hmingṭhatna pawh kan chang mek a ni. Hmingchhe thiang kan ni tawh lo a, tuna kan hmingṭhatna venghim tur hian theihtawpa ṭan kan lak a ngai a ni," a ti. DC hian nimin zing khan ramri hrûla police duty-te a tlawh a, inthlahdah lo turin a fuih a ni.

Kolasib Bawrhsap chuan, ramria police duty-te dinhmun tiderthâwng thei tur chi thlalak leh video thehdarh lo turin mi tin a chah a; thlalak leh video thehdarh avangin ruahmanna a hlawhchham phah theih thu a sawi. Ramri venhim hna ṭha zawka kalpui a nih theih nan police duty-te chu tlawh tam rih lo turin mi tin a ngen bawk.