Hmarchhak biala state ramri buaite Dawhkan kîlhoa chinfel chi a ni - Bhakta Charan Das, AICC

All India Congress Committee (AICC) general secretary (i/c Mizoram) Bhakta Charan Das chuan nimin khan thuchhuah siamin, hmarchhak biala state ramri buai awmte chu dawhkan kîlhoa chinfel chi a nih thu leh, Mizoram luhka National Highway 206 dan a ni leh Bairabi pawhtu rél kawng tihchhiat a ni chu danpui kalh a nih thu a tarlang.

Bhakta Charan Das chuan, hmarchhak state pali - Mizoram, Meghalaya, Nagaland leh Arunachal Pradesh ten Assam nena an inrìnaah ramri buai an nei tih tarlangin, "Chinfel tuma hmalakna a kal mek laiin tun hnaiah Assam CM Himanta Biswa Sarma chuan tharum hmangin ramri buaite hi chinfel a tum ta mai niin a lang a, inkahna hial thlengin, Assam police paruk an thih phah a ni. Assam CM hmalak dan hi BJP-in hmarchhak state-te inpumkhatna tihchhiat an tumna pakhat a ni a, India ram inpumkhatna atan thil ṭha lo tak a ni," a ti.

Hmarchhak biala ramri buaite chu international border a ni lo tih sawiin Bhakta Charan Das chuan, "India ram chhunga state ramri a ni a, tharum ni loin, dawhkana chinfel tur a ni," a ti a; state-te'n an dinhmun inhriatthiamna thui tak nei ve ve chunga dawhkana an chinfel ngei a duh thu a tarlang.

AICC General Secretary chuan, Vairengte leh Lailapur inkara buaina thleng avanga economic blockade kalpui tuma Assam-a NH-306 kawngpui an dang te, rél kawng an tichhiate chu pawi a tih thu sawiin,"India rama chengte hi inpui tawn zawk tur kan nih laia economic blockade kalpui hi India danpui kalh a ni. India sorkar rang taka inrawlhin, economic blockade kalpui tumna hi tihtawp nghal ni se ka duh hle a ni," a ti.