Minister-in thawktute lawmman tum dawn

Minister of state Lalchhandama Ralte chuan a bial Tuivawl constituency chhunga khaw ṭhenkhatah Covid-19 vei an pun avangin nimin khan hripui vei tam zualna - Sakawrdai, Vaitin, Khawpuar leh Thingsât khuate a tlawh a; ṭanpuina a pek bakah, tualchhunga thawk tura inpe nurse leh health worker mi pariat lawmman a tum tur thu a sawi.

Khawtlang hruaitute nen an inkawmnaah Lalchhandama Ralte chuan, a bial mipui an mangang tih a hriat thu sawiin, "In harsatna ṭâwmpui turin in kiangah ka awm reng dawn. Covid-19 avanga harsatna kan tawh hi inrahbehtir lo ila, he harsatna hian kan khawtlangah inhmangaihna rawn pàr chhuahtir se tih hi ka duhthusam a ni," a ti a; sorkarin himna tura inkaihhruaina a siamte thuawih taka zâwm turin mipui a ngen.

Chief minister Zoramthanga kaihhruai sorkarin hripui a reh theihna tura theihtawp a chhuah laiin ramriah harsatna a thleng tih sawiin Lalchhandama chuan, "Ram mipuite'n ei leh bârah harsatna kan tâwk deuh a nih pawhin, Mizoram tana tawrhnaah ngaiin rei lo te chhung chu chhel taka kan awm a ngai. Kan bulah mi harsa zawk khaichhuah ngai an awm em tih ngun lehzuala kan thlir a ngai a ni," a ti.

Minister Lalchhandama Ralte hian hripui veite enkawl tura tualchhunga inpe nurse leh health worker mi pariatte lawmman a tum tur thu a puang a; a bial chhunga Covid-19 vei tam zualna khaw pali - Sakawrdai, Vaitin, Khawpuar leh Thingsat mipuite chu August 2021 ration buhfai a khulsak dawn thu a sawi bawk.