Oil black market tihtawp sorkar mawh - IOC IOC-in lungawi lohnaa zualkona tur an puang

Indian Oil Corporation Ltd. (IOC) hotute chuan, Mizorama petrol leh die­sel dan loa zawrh (black market) a awm ṭhin chu mak an tih thu leh, a tihtawp kawnga hmalakna chu state sorkar mawhphurhna a nih thu an sawi a; tuialhthei leh gas chungchanga lungawi lohna neite chu thuneitute hnena thlen ṭhin turin an chah.

IOC hotute hian nimin khan Hotel Regency-ah thuthar thehdarhtute an kâwm a; Mizoramah petrol pump bul lawk lawkahte nen lam tuialhthei dan loa zawrh a awm ṭhin chungchanga zawhna chhangin IOC hotute chuan, "Black market a awm tih a takin kan hmu a, a mak kan ti khawp mai. Black market ti tawp tura hmalakna chu state sorkar tih tur a ni. Black market-a oil zawrh hi a him lo a, mipui tan thil pawi tak thlen thei a ni a, a ṭhat lohzia mipui zirtir a pawimawh," an ti.

IOC chief general manager (NE) G Ramesh chuan, India ram chu BS (Bharat Stage) IV aṭangin BS-VI ah a kai dâwrh avangin IOC pawhin hma an la a, tuialhtheia sulphur ppm 50 awm ṭhin pawh 10-ah tihhniam a nih thu a sawi a, BS-IV aiin BS-VI hi a thianghim zawk hle a, hetianga tih chhan chu boruak thianghlim zawk a awm theih nan a ni," a ti a; BS-IV aṭanga BS-VI a inthlak turin hmarchhak bial bik atan cheng vbc. 400 vel sèn a ngaih dawn thu a sawi.

G Ramesh chuan India hmarchhak leh Mizorama an hmunhmate leh filling station-te tihchangtlun tuma hma an lak mek thu sawiin, chumi tur chuan Mizoram sorkar hotute nen pawh an inbiak tawh thu a sawi a, "Mizoramah oil installation din kan tum a, retail outlet thar pakua din tum niin, sorkar kum lo awm leh turah hawn hman tum a ni a, Bairabi leh Bilkhawthlira mi chu hawn thuai tum a ni. Retail outlet hi NE pumpuiah za vel siam thar kan tum," a ti.

IOC hotute chuan tuialhthei leh eirawng­bawlna gas chungchanga harsatna leh lungawi lohna neite chu thuneitute hnena thlen ṭhin turin an chah a, chumi tur chuan tollfree no. 1800-2333-555 bakah, application 'IndianOil One' te, Facebook page leh Twitter-te hman ṭangkai theih a nih thu an sawi. IOC hotute sawi danin, Whatsapp application 'IndianOil One-ah' hriat tur pawimawh kimchang taka dah a ni a, Playstore aṭanga download tur a ni. Apps hmang hian petrol pump awmna te, complaint leh thil dang dang tih theih a ni.

Eirawngbawlna gas-te chu home delive­ry turin tih theih a ni a, Whatsapp hmangin no. 7588888824-ah REFILL tih thawn tur a ni. Aizawl­ah a enchhinna atana veng ṭhenkhata nikum aṭanga home delivery tih ṭan tawh a nih thu sawiin IOC hotute chuan, "Home delivery hi tih belh zel kan tum a, mahse, thil buaithlak tam tak a awm ve a ni," an ti.

Corporate Social Responsibility (CSR) lama an hmalakna sawiin G Ramesh chuan, "Tunah hian Aizawlah cheng nuai 56 senna turin YMA hall sak mek a ni a, Kolasib District Hospital tan ambulance pek a ni," a ti. Zawhna chhangin, CSR atan sum tam tham tak hmarchhak state tan dah ni mah se, hmarchhak state hrang hrangah sem rual a ngaih avangin Mizoram tan sorkar kum kal mekah cheng nuai 56 rua­hman a nih thu a sawi a, CSR hmanga puihna diltu an tam thu a sawi bawk.