ZPM ṭhalaiin Vairengte-ah temporary tactical headquarters din an rawt

ZPM Ṭhalai chuan thuchhuah siamin, ramri vengtu Mizoram police duty-te awlsam zawkna tura rawtna an neihte an tarlang a; Vairengte-ah temporary tactical headquarters din ni se an duh thu leh ramria duty-te tan bik doctor leh nurse dah ni se an duh thu an puang.

ZPM ṭhalaite chuan, an rawtnate chu a hlawh­tlin theih nan ngaih­tuahna sénga hma la turin Mizoram sorkara thuneitute an ngèn a; tun hnaia Mizoram chhunga Assam sorkarin harsatna a siam chungchanga huaisen taka lo bei lêttu Vairengte mipui, police-te, Kolasib district thuneitute hnathawh ropui an tih thu an tarlang bawk.

ZPM Ṭhalai rawt dangte
. FCSCA , PHE leh PE department-te'n ramria duty police-te tan thâ thawh se. Police-te hnena ei tur, tui leh kawlphetha hnianghnar pek kawngah nasa taka ṭan lak a ngai.
. Mizoram police-te'n lirthei an neih ṭhat loh avangin Transport department-in police phurh kual nan an bus thawh se.
. Police-te'n puan-in an mamawh khawp an neih loh avangin Sports department-in an tent (puan-in) ṭhate police hman turin thawh se.
. Doctor leh nurse a hranin attach ve ni se, damdawi leh Covid test kit nen awm rawh se.
. Police-te'n buhfai leh ei tur dang anmahni'n an inngaihtuah chawp ngai loin, Supply department-in ngaihtuahsak se, police-te chu an duty pangngaiah inthlúr bing rawh se.