Vairengte leh Saihapui V-ah ṭanpuina pe

Mizo National Youth Front (MNYF) headquarters president Lalrinawma, Assembly deputy speaker leh hruaitu dangte chuan nimin khan ramri hnaia khua Vairengte leh Saihapui-V an tlawh a; Mizoram police duty-te ei tur an pek bakah, Vairengte Joint VC leh Saihapui-V VC-te hnenah ṭanpuina sum an hlân.

MNF ṭhalai hruaitute hian ramria duty-te tan dailuah ip 20 leh tél bawmpui 10 an ken chu Vairengte Police-ah an hlân a; MNYF president Lalrinawma chuan, ram leh hnam chhanna tura chief minister Zoramthanga, Home minister Lalchamliana, bialtu MLA Lalrinsanga Ralte leh Vairengte leh Saihapui-V mipui huaisenna ropui a tih thu a sawi.

Lalrinawma chuan, Mizoram leh Assam inkalpawhna kawngpui dan mek a ni tih sawiin, "Kan pi leh pute'n 'Thih leh ruam khatah, dam leh tlang khatah' tih leh 'Sem sem dam dam, ei bil thi thi' tih thuthlung ropui tak an lo nei tawh angin, kan inthurualna leh kan inngaihsak tawnnain heng harsatna hi min paltlangtir ang tih ka ring a ni," a ti.

MNYF President chuan, "Mizote hian kan hun kal tawhah remna hlutzia leh man tamzia kan hre tawh a, hnam dang leh ram dang tihbuai emaw kan duh lo," a ti a; Mizote awm mai mai lai chala chil hnawmtute erawh chu Mizo mipuiin an palzam theih loh thu a sawi.