KHAWTHLIR

Thisen pe
Nimin khan John William Hospital, Lungleia thawkte chuan Lunglei Civil Hospital blood bank-ah thisen unit 21 an pe a, petute chu mipa 15 leh hmeichhia paruk an ni. Kolasib Electric Veng Branch YMA pawhin Kolasib District Hospital-ah thisen pein, mipa pakua leh hmeichhia parukte'n unit 15 an pe a; mimala pe (individual voluntary donor) pahnih an awm bawk.

MLA pahnih tel
Commonwealth Parliamentary Association (CPA) hnuaia Common Wealth Women Parliamentarians (CWP) chuan nimin khan 'CWP Roundtable: Gender Sensitive Parliaments in the 21st Century' an buatsaih a, Assembly Speaker-in a rawt angin MLA pahnih - Dr Vanlalṭanpuia leh Dr Vanlalthlana te an tel a, Assembly officer-te an tel bawk. He virtual meeting-ah hian ram hrang hranga mite an tel a; rorelna in sanga mihring nihna (gender) dinhmun a intluk tlàn theih dan tur zirho a nih bakah, hmalak dan turte sawiho a ni.

NEP 2020 lawm
Nimin tlai khan National Education Policy, 2020-in kum khat a tlinna lawmna pualin video conference neih a ni a, prime minister Narendra Modi-a'n NEP 2020 chungchanga thuchah a sawi. He hunah hian Mizoram aiawhin Governor Dr Haribabu Kambhampati a tel a, Governor secretary V Lalsangliana leh School Education secretary Dr Lalzirmawia Chhangte ten an ṭawiawm a ni.

Sample endik rûnpui nei zel
July 28, Nilaini khan Aizawla veng pangaah swab sample endik rûnpui neih chhunzawm a ni a, sample 5,298 endik aṭangin Covid-19 vei mi 193 (3.64%) hmuh chhuah a ni. Veng hrang hrangah hripui vei hmuh dan chu - Zuangtuiah sample 1,667 aṭangin 100 (5.99%), Khatla East-ah sample 665 aṭangin 22 (3.30%), Dawrpui Vengtharah sample 1,104 aṭangin 25 (2.26%), Lawipu-ah sample 1,029 aṭangin 33 (3.20%) leh Republic Vengthlangah sample 833 aṭangin 13 (1.56%) a ni.