COVID-19 laka invênna atan transport-in ruahmanna siam

Mizoram State Level Task Force on Mitigation of Coronavirus (COVID-19) duh dan bawhzuiin Transport department chuan COVID-19 laka Mizoram mipui an him theih nan March 12, 2020 khan thupek a tichhuak.

Transport department ruahman dan chuan, passenger phur chi lirthei - bus, taxi, maxicab leh rental car-te'n an passenger phurhte hming, address kimchang, phone number leh an kalna hmun tur (des­tination) chiang taka ziakin chhinchhiah vek tur a ni.

Khualzin phur lirthei, inter-state service chi reng reng chuan uluk takin passenger list an vawng reng tur a ni a, list-te chu thuneitute'n an en duh emaw, a copy an duh emaw a nih chuan a ṭul anga pe nghal thei turin an inring tur a ni. Counter agent license neitute pawhin an hnen aṭanga ticket la reng reng an hming, address kimchang, kal duhna hmun leh contact number felfai takin an vawng tur a ni bawk.

Transport secretary KT Beicho hoa meeting chuan, mipui phur ṭhin public transport motor-a seat, ban leh vawnchhante uluk taka tifai ṭhin turin advisory tihchhuah an rawt a; advisory chu tihchhuah a nih aṭanga a taka zawm a nih leh nih loh vil zui tur leh an hmalak dan report chawlhkar tin Transport department-a thehlut ṭhin turin Joint Director (Operations) leh DTO tinte an hriattir nghal. Transport department hian COVID-19 laka inven nan kutzungṭanga nemna biometric attendance an lâk ṭhin chu an titawp rih a ni.