Boundary Committee an ṭhukhawm "BEFR hi Mizoram sorkar dinna a ni"

Mizoram sorkar hnuaia Boundary Committee chu nimin khan an chairman Tawnluia, deputy chief minister hoin Forensic Science Laboratory conference hall-ah a vawi khat nan an ṭhukhawm a; Bengal Eastern Frontier Regulation (BEFR), 1875 chu Mizoram hmàr lam ramri atana Mizoram sorkarin a pawm awmchhun leh a dinna ngai reng a nih thu an puang.

Mizoram Boundary Com-mittee ṭhutkhawmah hian Mizoram ramri chungchang leh ramri buai chinfel dan tur sawiho a ni a; thutlukna siamin, "Mizoram-Assam boundary siamfelna atan Inner Line of 1875 hi Mizoram hmar lam ramri demarcate awmchhun a nih avangin hman ṭha kan ti a, kan dinna ngaiah kan la ding reng a ni," an ti.

Ramri buai chu tharum hmanga tihfel chi a ni lo tih sawiin, inbiakna Ieh sawihona hmanga tihfel theih ni se ṭha an tih thu an tarlang a; "Memorandum for setting up of Boundary Commission for Settlement, Delimitation and Demarcation of Boundary between Mizoram and Assam (2018), all political party president, all NGO president leh JAC-te'n hming an ziah hnan tawh chu a ṭul anga siam rem leh ennawn ni se," an ti a, chuta tan chuan sub-committee/working group din an rél.

July 26, 2021-a Assam police-te'n Vairengtea Mizoram police post Iuhchilh thut a, an luahlân leh silai an hmet puak hmasa chu an dem tak zet thu tarlangin Boundary Committee chuan, "Kan ram chhunga pumpelh theih thil thleng avanga mi eng emaw zatin nunna an chán leh hliam an tuar hi pawi kan ti tak zet a ni," an ti.

Boundary Committee chuan, "Assam police-te huaisen taka kan police-te leh Vairengte mipuite'n an lo do lêt a, an post ngai an luah leh thei hi ropui kan tiin kan chhuang a ni," an ti a; Mizoram-Assam ramri buai chungchanga sorkar hmalakna chu ṭha an tih thu sawiin, huaisen taka hma la zel turin sorkar an ngen.

Ramri chungchang chu hnam thil a nih avangin Mizo mipuite ṭangruala thapui thawh zel tur leh harsatna a awm deuh a nih pawhin chhel taka dawh hrâm hrâm turin mipui an ngen a, "Ramri buaina avang hian hnam dangte chunga harsatna siam lo turin Mizo zawng zawng kan ngen a ni," an ti. Mizoram chin humhim zui zel turin theihtawp an chhuah dawn tih sawiin, Mizoram mipui ṭawiawmna an ngen a ni.

Boundary Committee hi July 27, 2021-a Mizoram sorkarin a din a ni a, deputy CM Tawnluia chu chairman niin, Home minister Lalchamliana chu vice chairman a ni a, Home Secretary chu member secretary a ni.

Member dangte chu - minister of state pathum - K Lalrinliana, Lalruatkima leh TJ Lalnuntluanga te, Chief Secretary, Addl. Chief Secretary, DGP, MP hlui CL Ruala, Home secretary hlui Lalbiakzama, Prof. Jangkhongam Doungel, Dr Joseph K Lalfakzuala te bakah, NGO leh political party hrang hrang aiawhte an ni.