Mizoram-Assam ramri chingfel turin Central YMA-in sorkar laipui an ngen

Central YMA chuan nimin khan thuchhuah siamin, Mizoram humhim turin YMA-in a tih theih chinah hma a la zel dawn tih an tarlang a; Mizoram leh Assam ramri buai chu muanawm taka a rang thei ang bera chingfel turin sorkar laipui an ngen.

CYMA thuchhuah chuan, "YMA chuan a theihna chin chinah kan pi leh pute aṭanga kan rochun, hmasang aṭanga kan ram humhim turin a hma a la zel dawn a, India ram state muanawm leh ram tana chhenfakawm leh rinawm nih zel a tum. Ramri chungchanga YMA dinna chu BEFR 1875 a ni a, hei hi kan ramri tehna dik berah a ngai a ni," a ti.

July 26, 2021-a Assam police 200 rualte ramri duty-te pawisa loa Vairengte daia an lût chu an dem thu an tarlan rualin CYMA chuan, Assam police-te lo nawr lettu Mizoram police-te fakawm an tih thu leh Mizoram sorkarin puitling taka buaina a hmachhawn dan chu lawmawm an tih thu an tarlang.

CYMA chuan, Assam chief minister Himanta Biswa Sarma-a'n thu déngkháwng leh nghahchhan bulbâl nei lo thu media hrang hranga a puang chhuak chu an dem thu an tarlang a, "Heng thu dik lo, nghahchhan nei lo hmanga Mizo mipui min puhna hrang hrangah hian Assam CM hi ngaihdam dil turin kan phût a ni," an ti a; Assam CM-in Mizoram a puhna hrang hrangte an chháng let a ni.

CYMA-in Assam CM an chhàn letna
1. Mizoram sorkarin theihtawp chhuahin ruihhlo leh ruihhloin chhiatna thlente a do tlat a ni. Sorkar hmalakna ṭawiawmin YMA chuan ruihhlo leh a kaihhnawiha kan him theihnan hmalakna a kalpui nasa hle a, SRS leh CADS-te dinin, vawiin thlengin chak takin hma a la mek zawk. Mizorama ruihhlo man tam tak hi Cachar leh Hailakandi district aṭanga lo lut a ni.
2. Assam sorkarin bâwng phurh kual an khap avangin Mizoramin harsatna kan tâwk lo, bâwngte hi Mizoram khawchhak lam aṭanga lak a ni a, Assam aṭanga lak luh a ni lo.
3. Myanmar ráltlânte chungchangah Assam sorkar nen a inbiakna vawi khat mah a la awm lo. Ráltlante inbenbelna chungchang hi state thuneihna loin, sorkar laipui thuneihna a ni. Kan unau ráltlante leh kan mihringpuite dinhmun harsatzia hriain theihtawpin kan lo tuamhlâwm a, tun dinhmunah ráltlante hi tam tak an ram lamah an kîr leh tawh a ni.