Covid-19 vanga thi mi 3 awm belh
July 29, Thawhlehni zan khan Covid-19 vei enkawl mek zinga pakhat a thi a, nimin khan mi pahnih an thi leh bawk. Sorkar chhinchhiah angin hripui vanga Mizorama thi chu mi 143 an ni tawh.
Covid-19 vei enkawl lai Hrangdawli (56) w/o R Sangṭhuama (L), Keiṭum, Serchhip district chu July 29, 2021 zan dar 11:10 khan State Referral Hospital-ah a thi a, nimin zing khan an khuaa kohhran hall-ah vui a ni. Amah hi Covid-19 vei a ni tih July 28 khan hmuh chhuah a ni a, a tuk July 29-ah SRH-ah dah luh a ni.
Nimin zing dar 7:45 khan Mangi (41) w/o Lallungkhama, Chawlhhmun, Aizawl chu hripui vangin SRH-ZMC-ah a thi a, nimin vek khan Chawlhhmun Presbyterian Kohhran Hall-ah vui a ni. Covid-19 positive a ni tih July 5, 2021 khan hmuh chhuah a ni a, July 9-ah SRH-ah dah luh a ni. Amah hi thisen sang leh zunthlum nei sa a nih thu YMA hruaitute'n an sawi.
Nimin vek tlai dar 4 khan PS Lalrinngheta (40) s/o Zalawma (L), Armed Veng South chu hripui vangin SRH-ah a thi bawk a, nizan dar 8 khan an inah vui a ni. Amah hi Covid-19 vei a ni tih June 26, 2021 khan hmuh chhuah a ni a, July 5 aṭangin SRH-ah enkawl ṭan a ni.
Mizorama Covid-19 vanga thi hmasa ber Lalsangkhuma, Dawrpui chu October 28, 2020 khan a thi a; nikum chhung khan mi pariat thiin, October-ah mi pakhat, November-ah mi panga leh December-ah mi pahnih an thi.
Kumin 2021-ah chuan January, February leh March thlaah mi pakhat ṭheuh, April-ah mi pali, May-ah mi 25 leh June-ah mi 25 an thi a, July thla kal mekah nimin tlai dar 5 thleng khan mi 50 an thi tawh. Covid-19 vanga Mizorama thi tawh zat chu mi 143 an ni.