MZP-in PM leh HM lehkha an thawn Inkah chhanah Assam CM Himanta an puh

MZP General Headquar­ters chuan nimin khan prime minister Narendra Modi leh Union Home minister Amit Shah hnenah lehkha thawnin, July 26, 2021 tlaia Mizoram leh Assam police-te inkah chungchang an sawifiah a; inkah chhan chu Assam chief minister Himanta Biswa Sarma cho chhuah leh hmalakna a nih thu an tarlang.

MZP tarlan danin, Prime Minister leh Home Minister lehkha an thawnah hian July 26-a state pahnih police-te inkah chu Assam CM Himanta Biswa Sarma cho chhuah a nih thu an tarlan bakah, Himanta Biswa Sarma chu Assam CM a nih hnuah an thenawm state-te awm ṭha lai nasa taka a tihbuai dan te, state ṭhenawmte vau leh tihṭhaih nana sipai lak belh leh state ramria commando tam tak dah a tum thute an ziak a ni.

Mizoram mipuite rál­muang taka an awm laia Assam CM ruahmanna anga silai keng police 200 leh Assam tualchhung mi ṭhahnem tak Mizorama an luh thu te, Assam police-te chu ambulance leh bungraw chi hrang hrang nena kal an nih thu te, awlsam takin ramria duty CRPF an paltlang avangin CRPF-te chu Mizoram tan rin ngam chi a nih tawh loh thute an thlen bawk.

MZP chuan, MP K Vanlal­vena'n national media hmaah na taka Mizo mipui thlavâng a hauh chu thlamuanthlak an tih thu sawiin, "Hei hi ngaimawha Assam sorkarin Delhi thlenga ûm zuitu tur intelligence tirh a nih thu an puang hi kan duh lo hle. Mizo mipui aiawhtu kan MP chungah thil ṭha lo eng pawh a thleng a nih chuan a thlavâng na takin kan hauh zel dawn a ni," an ti.

PM leh HM hnena MZP ngenna
1. State pahnih inkara buaina awm thei véng tura Vairengte dáia awm CRPF chungah inkaihhruaina dan lekkawh tur leh an tih tur àwm tak an tih loh avanga an phu tâwka hrem turin.

2. Assam-in tam zawk an nihna leh India ram zau zawk nena inpawhna kawtchhuah an nih chhuanga Bengal Eastern Frontier Regulation (BEFR) 1875-in inrìna a siam pêla Mizoram páwngnêk fo lo tura khap turin.