ZPM MLA-te'n an fund mipui tan An hmang zel dawn - ZPM SG

ZPM secretary general (SG) K Sapdanga chuan, ZPM thlan tlin MLA-te chuan an development fund mipui tan an hman zel dawn thu sawiin, "Party fund atan cheng khat pawh pawhhêk kan tum ve lo," a ti.

Nimina ZPM party pisaa inkhawmah thu sawiin K Sapdanga chuan, "ZPM-in kum khat awrh chauh MLA kan la nei a, chutih chhung chuan Aizawl khawpuia ZPM tlinna bial paruk leh thingtlang lama ZPM tlinna bial pahnihte chu ráng ruk khawpin an chei tawh. Chu chu kalphung thar chu a ni. ZPM MLA-te chuan an fund hi mipui tan an hmang zel dawn. Party fund atan cheng khat pawh pawhhêk kan tum ve lo. Unit nen inthuruala sum siam nan hman a thiang hek lo. Kan Val Upa Council-in an remti tlat lo," a ti a, party dang MLA bial 33-ah chuan hmasawnna hnathawh hmuh tur a vàn thu a sawi.

ZPM Secretary General chuan, 'Pawl thar si, VC/LC mal din hi a tih chi dawn em ni, kan inhmu lian lutuk a ni lo maw?' tih zawhna an dawn tam thu sawiin, "February 11, 2020-a Delhi state MLA election-ah khan Congress candidate 70 zinga 63-te khan an dahkham an chawi. Delhi-ah tlawhchhan tur an ṭiavai tak siah chuan, Mizorama Congress mipui tam zawk hi chuan thlasik an tuar chhuak zo tak tak tawh dawnin an hre tawh lo a, MNF belhbul ngawt an hreh si a, ZPM an rawn ngaihven ta hi a mak lem lo," a ti. 

ZPM party ṭhalaite chuan COVID-19 laka invenna tura Mizoram sorkar hmalakna hrang hrangte chu an thlàwp thu an tarlang a; chutih rualin, invennaah nasa zawka hma la turin sorkar an phût nghal bawk. ZPM ṭhalai chuan, "COVID-19 lakah Mizoram mipui kan him theih nan sorkar, kohhran, tlawmngai pawl hrang hrang, political party tinte leh chhungkua leh mimal ang pawha kan ṭan tlàn a ngai tak zet a ni," an ti.

Sorkar hmalakna an thlàwp thu an sawi rualin ZPM ṭhalai chuan, "Mizoram mamawh châwk luhna luhká ber Vairengte dáia checkgate leh Bairabi checkgate-a Mizorama lut turte COVID-19 an kai leh kai loh lo endikna hmun erawh chu duhthu a sâm lo hlea hriat a ni. Thawktu an indaih loh avangin Mizoram lo luh tumte tan rei tak nghah a ngai ṭhin a, hei hian kai palh an awmin, inkai darh theihna a tisang hle a ni," an ti a; thawktu dah belh thuai tur leh hmanrua ṭha zawk pe vat turin sorkar an phût a ni.