COVID-19: MIZORAM DINHMUN Hripui vei 774 hmuh belh a ni

July 29, Ningani khan Mizoramah Covid-19 vei mi 774 hmuh chhuah a ni a, kumin July thla chhungin mi 16,679 hmuh chhuah a ni tawh. Hripui vanga thi mi pahnih an awm belh a; nimin khan hripui laka fihlim tawh mi 342 chhuahtir an ni thung.

Covid-19 vei hmuh tharte chu mipa 343 leh hmeichhia 431 an ni a; ZMC laboratory-a hmuh chhuah 163, TrueNAT-PCR hmanga hmuh 35 leh Rapid Antigen Test hmanga hmuh 576 an ni.

Hripui vei hmuh thar 774-te chu natna lang chhuak 336 leh lang lo 438 an ni a; tualchhunga kái 772 leh state páwn aṭanga tun hnaia rawn lut pahnih niin, tualchhunga kái zingah kàina chin hriat loh mi 341 an awm. Nimin zing khan enkawl mek mi 11,862 an awm a, an tam lai ber a ni.

IDSP record angin, Mizoramah Covid-19 vei mi 37,171 hmuh chhuah a ni tawh a, mipa 19,753 leh hmeichhia 17,448 an ni. Nimin tlai dar 5 thleng khan mi 25,410 (68.63%) chhuahtir an ni tawh a, mi 143 (0.38%) thi tawhin, enkawl mek mi 11,518 (31.20%) an awm.

July 29, Ningania swab sample endik dan chu - ZMC laboratory-ah Aizawl, Serchhip leh Mamit district-a mi 1,908, TrueNAT hmangin district pakuaah 247 leh RAT hmangin district 11-ah 4,640 a ni a, a vaiin sample 6,795 (mipa 3,366 leh hmeichhia 3,429) niin, chu'ng aṭanga hripui vei hmuh chhuah 774 chu 11.39% a tling. Positive percentage hi ZMC-ah 8.54%, TrueNAT-ah 14.17% leh RAT-ah 12.41% a ni.

Ningania district-a Covid-19 positive hmuh dan chu - Aizawlah mi 523, Kolasib-ah 97, Lawngtlaiah 50, Lungleiah 49, Champhaiah 18, Siahaah 17, Mamitah 14 leh, Serchhip leh Saitualah mi pathum ve ve a ni. Mi 774-te chu Aizawla veng 55 leh khaw dang 39-a mite an ni a; Kolasib khawpuia veng 11, Lunglei khawpuia veng pariat Lawngtlai khawpuia veng pasariha mite an tel.

Hripui vei hmuh thar mi 774 zingah naupang kum tling lo 190 chuang awmin, an zingah symptom nei 70 vel an awm a; nausen kum khat tling lo paruk awmin, a naupang ber chu thla hniha upa a ni. Kum 60 chung lam 50 chuang awmin, an zingah symptom nei an awm nual a; a upa ber chu kum 93 mi a ni.

ZMC-a hmuh chhuah mi 163-te chu tualchhunga kái leh hri vei tawh nena inhnaihna nei deuh vek an ni a, an zinga pariat chu symptom nei an ni. TrueNAT hmanga hmuh mi 35-te pawh tualchhunga kái deuh vek niin, kaina hriat loh pali an tel a, symptom nei 13 an awm.

RAT hmanga hmuh chhuah mi 576-te chu tualchhunga kái vek an ni a, an zinga mi 334 chu an kàina chin hriat a ni lo. An zinga 316 symptom nei an ni a, mi 260 chu symptom nei lo an ni thung.
Nimin khan tlai dar 5 thlengin hripui laka fihlim tawh mi 342 chhuahtir an ni a; Aizawl district-ah mi 225, Kolasib district-ah 67, Siaha district-ah 28, Mamit district-ah 17, Lawngtlai district-ah pali leh Serchhip district-ah pakhat an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 9,809 hmuh chhuah a ni tawh a, TrueNAT-PCR hmangin 2,253, RAT hmangin 25,108 leh Guwahati-ah pakhat hmuh chhuah a ni tawh.

IDSP tarlan danin, July 29, 2021 thlengin Mizoramah swab sample 6,17,309 endik a ni tawh a, chu'ng aṭanga Covid-19 vei hmuh tawh zat 37,171 chu 6.02% a ni. Hripui vei hmuh tawh zinga mi 32,973 chu Mizoram chhunga kái chhâwng an ni a, mi 4,198 chu Mizoram páwn aṭanga an rawn luh hnua hmuh chhuah an ni.