MPCC-in Vairengte dáia CRPF dah ṭha ti lo

Congress party chuan thuchhuah siamin, Vairengte dáia Central Armed Police Force (CRPF) dah chu ṭha lo an tih thu an tarlang.

MPCC thuchhuah chuan, ZPM leader Lalduhoma'n July 26, 2021 tlaia thuchhuah a siamah, ramrî-ah buaina dang a awm tawh loh nan a ṭulna hmun apianga central force dah turin Union Home Minister a ngen chu pawi an tih thu a tarlang a, "July 26, 2021-a Mizoram leh Assam sipaite inkahna chhan hi status quo chhunga duty mek CRPF-te'n an tih tur an tih loh vang a ni," a ti.

July 26-a state pahnih police-te an inkah laiin CRPF duty camp-a himna zawnga tlân lut Kolasib SP leh Mizoram police ṭhenkhatte chu CRPF duty-te'n humhimna an pe duh lo nia sawiin MPCC chuan, "He lai hmuna central force an awm loh hi Mizote tan a ṭha zawk a, Mizote kan invalh zauna dâltu an ni zawk," an ti a; status quo huam chhungah central force an duty reng dawn chuan Mizote luah theih chin ram hloh zel a ni dawn niin an sawi.

Congress party chuan, Vairengte dáia central force dah tura Union Home Minister ngen chu tih chia an ngai loh thu sawiin, "July 28, 2021-a Vairengte leh Lailapur inkara duty tur CRPF company 6 an rawn thlen belh nghalte hi pawi kan ti hle zawk a ni," an ti.

MPCC chuan, July 26, 2021-a CRPF duty-te chêt dana a lungawi loh thu Home minister Lalchamliana'n July 27-a CRPF hotute hnena ṭawngkaa a thlen chu lawmawm an tih rualin, Assam nena buaina hmunah Mizoramin central force a mamawh loh thu emaw, an dah lui dawn a nih pawhin CRPF aia rintlak zawk dah turin Ministry of Home Affairs-ah thlen ngei se an duh thu an sawi bawk.