MP K Vanlalvena laka Assam chêt dan MNYF-in an chháng

Mizo National Youth Front (MNYF) chuan thuchhuah siamin, Rajya Sabha MP K Vanlalvena'n tun hnaia media hmaa a thusawi avanga Assam state sorkar leh police aṭanga vauna a dawng chu thinurthlak an tih thu an tarlang a, "Assam sorkar chu an hmai phih faina turin tih hreh an neih lohzia a tilang chiang hle," an ti.

MNYF chuan, Mizoram rún tura Assam police-te an lut chu hriatthiam theih a ni lo tih sawiin, "Kan MP-in media hmaa 'If they come again, we shall kill them all' (An lo kal leh a nih chuan kan lo ṭingmit dial ang) a ti hi Mizote'n kan thláwp a ni tih Assam sorkar hian hria se kan duh," an ti a; Mizo MP chungah thil ṭha lo a thleng a nih chuan Mizo ṭhalaite na takin an che ve dawn tih Assam sorkarin hria se an duh thu an tarlang.

Assam police officer pakhat GP Singh-a'n Twitter-ah K Vanlalvena vauna nia ngaih theih tur a dah chu àwm lo an tih thu sawiin MNYF chuan, "India rorelna sanga member zah lohna lian takah kan ngai. State khat police hotu pakhatin India rorelna sanga member a vau hi a chunga hremna lekkawh ngei kan phût a ni," an ti.

MNF ṭhalaite chuan, Assam CM Himanta Biswa Sharma-a'n ramria commando 4,000 tirh a nih tur thu a sawi chu demin, "State leh state invauna rapthlak hi a la thleng ngai lo. Assam CM hi India rama remna leh muanna tichhetu a ni a, CM ni tlakah kan ngai lo," an ti a; chutih rualin, Assam commando dodal turin Mizoram police-te bakah, Mizoram chhungkaw tinah Assam commando ang an awm vek thu an tarlang bawk.