Covid-19 veite enkawlna tura buatsaihte Minister-in a enfiah

Health minister Dr R Lalthangliana chuan nimin khan Aizawla Covid care centre (CCC) tura buatsaih mek Vaivakawna Multipurpose Sports Complex leh Falkland Venga Rajiv Awas Yojana (RAY) building bakah, dedicated covid health cetre (DCHC) atana buatsaih mek Kulikawn Hospital-te a enfiah.

Sorkar thuchhuah tarlan danin, Multipurpose Sports Complex-ah hian inchhawng pathumah mi 80 vel awm thei tura ngaih a ni a; la peihfel lohte chu a rang thei ang bera peih turin Health Minister chuan thawktute a chah.

Rajiv Awas Yojana (RAY) hnuaia sak in hrang hrangah mi 300 vel awm thei tura ngaih a ni a; tui pipe la vuah zawh lohte chu August 4, 2021-ah an zawh theih rin a nih thu leh thil dang chu peih thawkhat a nih thu thawktute'n Minister an lo hrilh.

DCHC atana buatsaih mek Kulikawn Hospital-ah mi 50 awm thei tura ngaih a ni a, kar leh lamah peih hman beisei a ni.