NEDA chhuahsan turin MNF ngen

Mizoram Pradesh Youth Congress Committee (MPYCC) chuan, North East Democratic Alliance (NEDA) convener Himanta Biswa Sarma, Assam chief minister avangin MNF party chu NEDA chhuahsan turin an ngen.

MPYCC chuan, Assam CM Himanta Biswa Sarma chu inpumkhatna aia inhmélmâkna buaipuituah puhin, thawhpui zel tlâk a nih loh thu an tarlang a, "BJP din NEDA kaihruaitu ber Himanta Biswa Sarma hian Mizoram chauh ni lo, India hmarchhak state dangte a tihbuai nasat zual zel avangin Mizoram aṭanga NEDA zawmtu MNF sorkar ngei pawh hi Mizo mipui tan tia NEDA chhuahsan turin kan ngen a ni," an ti.

NEDA chu BJP-in May 24, 2016-a an din a ni tih sawiin MPYCC chuan, politics-a hmarchhak state-te inzawm khawmna atan din, hmarchhak mipui hamṭhatna humhalhna atana tih a nih thu an sawi a, "An hotupa ber Himanta Biswa Sarma hian Assam CM ni chungin a ṭhenawm state ramri nêk buaiin a rîkrâp nasa ta hle," an ti a; Himanta chu hmarchhaka buaina bulpui leh chawk buaitu ber a nih thu an sawi.

Mizoram CM Zoramthanga'n BJP kaihhruai NDA leh NEDA chhuahsan an tum loh thu a sawi a, an thurin (ideology) erawh an zawm loh thu a sawi thu The Economic Times-in December 15, 2018-ah an tarlang tih sawiin MPYCC chuan, "Kan CM hian BJP nena thurin inang nei lo an nih phawt chuan Mizoram min chhuhsak ṭhen tumtu, Mizo mipui min hrêk duhtu Himanta Biswa Sarma kaihhruai NEDA hi Mizo ram leh hnam tan a thlàwpna tihtawp a hreh kan ring lo," an ti.

Congress ṭhalaite chuan, tuna hmarchhaka ramri buaina tam tak chu Citizenship Amendment Act vang a ni tih a lang chiang nia sawiin, sorkar laipuia CAA an thlàwpna titawp turin MNF sorkar an ngen bawk.