Agriculture hmalakna sawiho

Agriculture minister C Lal­rinsanga hoin nimin khan a pisaah Agriculture Development Board meeting neih a ni a, kumin May thla chhunga Board hmalakna leh hmalak zel dan turte an sawiho.

C Lalrinsanga chuan, Covid-19 vangin mahni pawimawhna zâwn apiangah invenna leh intodelhna kawngah mipui leh department hrang hrangte'n theih­tawp an chhuah tih a sawi a, "Khauh taka lockdown kalpui a nih lai pawhin Agriculture department chuan bahlah vak loin hma kan la thei hi a lawmawm a, Pathian malsawmna a ni," a ti.

Minister chuan, intodelh tura hmalaknaah department leh lo neitute an pawimawh thu sawiin, "Covid-19 bo­ruak avangin a tìr lamah lo neitute'n harsatna an tâwk a, amaherawhchu, sorkar laipui pawhin an pawimawhzia hriain lockdown khauh tak hnuaiah pawh lo neitute tan hna thawh a phalsak hian an pawimawhna a tilang," a ti a; Board member leh official-te thawhhona ṭha a tih thu a sawi.

Agriculture Development Board vice chairman H Biakzaua chuan, Covid-19 boruakah lo neitute hamṭhatna ngaihtuaha zin chhuah programme an buatsaih chu sorkar laipuiin lo neitute tana scheme a siam­te inhrilfiah nan an hman thu leh chu'ngte chu a hlawhtling hlea a hriat thu a sawi.