KHAWTHLIR

Harsatna siam lo turin hriattir
Kolasib DC chuan, Kolasib district chhunga tun hnaia buaina chhuak avangin hnam dang, Kolasib district chhunga awm emaw, district paltlang tur emawte tan harsatna siam zawnga che lo turin mipui a hriattir. DC chuan Kolasib district-ah hnam dang harsatna tâwk an awm a nih chuan, a rang thei ang bera thuneitute hnena thlen turin mipui a chah a; thu thlenna turte chu magistrate Lalvenhimi Ralte phone 8974761551, Kolasib SDPO R Vanlalduata phone 9436142158 leh DSP Vanlalzawni phone 8575711742-te a ni.

Thisen pe
Ebenezer Unit ṬKP, Serchhip chuan ṬKP Day pualin nimin khan Serchhip District Hospital blood bank thisen pek an huaihawt a, thisen unit 17 pein, petute mipa pakua leh hmeichhia pariat an ni.

Kohhranin tanpui
Mizoram-Assam ramri vênna kawnga a ṭula hman atan Chaltlang Presbyterian Kohhran chuan nimin khan Vairengte Joint VC hnenah ṭanpuina Rs. 1,00,000 an hlân a; Vairengte dáia police duty post thawm ṭhat nan Vairengte Police Station-ah Rs. 50,000 an pe bawk.

MIMA-in PM ngen
Mizoram Merchant Association chuan prime minister Narendra Modi hnenah lehkha an thawn a, Assam hoin Mohammedpur leh Ramnathpur rél chawlhhmuna rél kawng an tihchhiat chu siamṭhat thuai a nih theih nan hma la turin an ngen a, NH-306 kawngpui dan tihtawptir turin an ngen bawk. An lehkha copy chu Union Home Minister, Mizoram leh Assam chief minister leh, Confederation of All India Traders-te hnenah an pe tel a ni.

Rs. 2.25 la dawn
Online kaltlanga electric bill pekah bill zat bakah Rs. 2.25 pek tel a ngai tawh dawn tih Mizoram sorkar thuchhuakin a tarlang. Sorkar thuchhuah chuan, Rs. 2.25 belh chu National Payments Corporation of India thuchhuak anga tih a nih thu tarlangin, "P&E department bituk ni loin, online-a bill peknate lam bituk a ni," a ti.