COVID-19 laka kan him theih nan theihtawpin hma kan la - CM

Chief minister Zoramthanga chuan, COVID-19 laka Mizoram a him theih nan theihtawp an chhuah thu sawiin, "Hei baka hmalak ngaihna kan hre rih lo," a ti.

Nimina Kolasib a tlawhnaa thuthar thehdarhtute zawhna chhangin Zoramthanga chuan, "Village council inthlan tur hi COVID-19 avangin a hun takah neih theih loh a hlauhthawnawm. Mipuiin MNF sorkar hlimthlá an hmu ṭan a, kawng tinréngah development a inṭan chho mek," a ti a, V/C inthlanah majority lian tak MNF-in neih theih an inrin thu a sawi. Chief Minister chuan, COVID-19 chungchanga sorkar hmalakna a ṭhat tâwk leh ṭhat tâwk loh zawhna chhangin, "Hei bak chu tih ngaihna kan hre lo. Cabinet zawng zawng inkokhawmin medical lama hotu zawng zawng nen hma kan la a ni. Pawisa pawh an mamawh apiang sawi tur leh limit awm loa kan pek char char dawn thu kan sawi. Kawng chi hrang hranga hma lain, international leh state border-te pawh luh bikna siamin uluk taka endik a ni," a ti.

CM Zoramthanga chuan, Pathian ṭanpuina avangin COVID-19 chu Mizoramah a luh loh hrâm an beisei thu sawiin, "Hei bak pawh hmalak a ngai a nih chuan hma kan la zel ang," a ti a, sorkar function lian tihtawp vek a nih thu a sawi.