Mamit dist. mite chîâi lo turin chah

Mamit DC Dr Lalrozama chuan, Mamit district mi leh sa tangkhang lo hawte zingah Covid-19 vei an awm avangin district mipui­te chu chîâi lo tur leh fimkhur turin a chah.

Mamit Bawrhsap chuan, "Positive hi Delhi aṭanga rawn haw zinga mi a ni a, result hriat a nih veleh June 4, Ningani zing karah khan Covid-19 dedicated hospital Zoram Medical College-ah ambulance-a phurh chhoh nghal a ni," a ti.

Mamit district-a hripui vei chu an rawn haw kawnga a chuanpuite nen Bairabi aṭang­in péng kawi loin bus-in Mamita dah a nih thu te, Mamita medical team-te nen lo chuan inhnaihchilh leh contact an neih hriat a nih loh thu te, Mamit Tourist Lodge quarantine centre-ah felfai tak leh mipui tlawh theih loha khung hran an nih thute a tarlang a; a hawpui mi pariat pawh an sample endik vek a ni a, mi dangin hripui an kai loh thu a tarlang bawk.