Sorkar ruahmannate zah turin State páwn aṭanga hawte hriattir

Kolasib district magistrate Dr H Lalthlangliana chuan hriattirna chhuah­in, phai lam (state dang) aṭanga Mizoram mi leh sate Bairabi rél chawlhhmun leh Vairengte kaltlanga hawte tana hriat tur a tichhuak a; state páwn aṭanga lo hawte chu sorkar ruahmannate zah turin a hriattir.

Kolasib District Magistrate tarlan danin, Mizoram mi leh sa tangkhang lo hawte lo enkawlna leh Mizoram an lo luh a, harsatna an tawh loh nan Kolasib district administration-in theihtawp chhuahin a lo tuamhlâwm ṭhin a, sorkar sum séngin an ei leh in tur buaipui a nih bakah, chhun leh zan, ni sá leh ruahpui karah Kolasib district-a sorkar mi leh sate'n mahni hrehawm pawisa loin an lo buaipui ṭhin a ni.

Kolasib district-a sorkar official-te leh task force-te'n theihtawp chhuaha an lo buaipui laiin, tun hnaia Delhi leh Mumbai aṭanga lo hawte zingah nungchang duhawm lo leh harsatna siam zawnga chê a, mipui himna atana district thuneitute ruahmanna palzút an awm tih tarlangin Dr H Lalthlangliana chuan, "Hei hian Mizo náwlpui angin min tihhmingchhiat bakah, mipui himna a tichhe thei a ni," a ti.

Magistrate chuan, tangkhang hruai haw zingah awm ṭha duh lo leh harsatna siam, khuahkhirh theih loh an awm a nih chuan a ṭul angin an chungah action lak a nih tur thu leh, thawn lêt thlenga hmalak a nih tur thu a tarlang a; tangkhang buaipuitu sorkar aiawh leh state páwna Mizo welfare/association-te chu district administration ruahmanna siam ngai pawimawh a, Mizorama haw turte hnenah kaihhruaina ṭha pe lâwk ṭhin turin a ngen bawk.