KHAWTHLIR

Nimin khan Rubber Board executive director Dr KN Raghavan leh a thawhpuite chuan Raj Bhavan-ah governor PS Sreedharan Pillai an kawm a, Mizoram chhunga rubber chinna hmunhma zauh dan tur an sawiho. Dr KN Raghavan leh a thawpuite chuan India-in rubber a mamawh belh nasat thu sawiin, "Tun dinhmunah rubber mamawh zat aṭanga a chanve chiah India ramah tharchhuah a ni. Rubber mamawhnate phuhruk a nih theih nan India hmarchhak lam sorkar laipui chuan a rawn hawi tawh," a ti.

Pachhunga University College NSS unit chuan nimin khan an college-ah blood donation camp an huaihawt a, Aizawl Civil Hospital tan thisen unit 273 an pe a, a petute mipa 154 leh hmeichhia 119 an ni.

Nimin khan Mamit DC conference hall-ah Mamit district chhunga medical officer pasarih leh laboratory technician 10-te tan nithum awh tur 'Hands on training and Distribution of Accuster Mobile Lab' neih a ni a, district bawrhsap Dr Lalrozama, IAS chuan hmanpuiin cheng nuai 48.07 man hu accuster mobile lab 11 a sem nghal. Accuster mobile lab-ah hian thisen test 36 a tih theih.

MHIP General Headquarters chuan, COVID-19 hri léng laka Mizoram a him theih nan MHIP member zawng zawngte chu zanin (Thawhlehni) dar 10-ah ṭawngṭai ṭheuh turin an ngen, "Mahni awmna hmun ṭheuhah kan zavaiin ṭhahnemngai taka ṭawngṭai ṭheuh turin kan inngenin kan insawm a ni," an ti.

Sports minister Robert Romawia Royte chuan nimin zing khan Aizawl South-I huam chhunga a department hnuaia hmalakna hrang hrangte a tlawh a, hnathawh dan leh hnathawh turte a enfiah. Robert Romawia chuan Zoramthanga kaih­hruai sorkar chuan ṭhalaite hmakhua thlirin sports revolution thlentir an tum thu sawiin, "Union budget leh foreign funding aṭanga sport tihhmasawnna kawng chak taka buaipui mek a ni," a ti.