MZP-in an duhte CM-ah an thlen

MZP hruaitute chuan nimin khan chief minister Zoramthanga chu a pisaah an hmu a; Tripura-a Mizote chênna Zampui tlangdunga Bru dah an tum, New Kawnpuia Mizo IR police pahnih kutthlaktu la man loh, Myanmar-a Mizoram mi tángte leh Remna Ni hman dan tur chungchangte an sawipui a; Covid-19 do nan ambulance leh RT-PCR lei belh turin an ngen bawk.

MZP hruaitute hian Tripura sorkarin an state chhunga Mizote chenna, Jampui leh a chhehvelah Mizoram aṭanga chhuak Bru-te dah a tum chungchangah a rang lama hma la turin CM an ngen a; CM Zoramthanga chuan, "Zampui tlangdunga Mizote himna turin theih­tawp kan chhuah mek a, kan unaute tibuai zawnga hmalakna awm lo turin Tripura sorkar thuneitute kan hrilh tawh a, inremna thuthlung anga kal zel a nih theih nan hmalak zel a ni ang," a ti.

New Kawnpuia Mizo IR police pahnih kutthlak rawn nia sawiah, kutthlaktute tun thlenga man an la nih loh chungchangah Chief Minister chuan, misualte man turin hmalak mek a nih thu a lo hrilh.

Covid-19 chungchanga hman tur ambulance leh RT-PCR lei belh thuai a nih theih nan leh a leina pe duhte'n awlsam zawka an pek theih nana ruahmanna siam turin MZP hruaitute chuan Chief Minister an ngen a; CM Zoramthanga chuan, "Sorkar sum dinhmun thlir chung zela ruahmanna siam a ni ang," a ti.

MZP hruaitute chuan, Myanmar-a Mizoram mi tangkhang mekte hruai haw an nih theih nan hma la tura an ngennaah Zoramthanga chuan, Myanmar-a táng mek mi 300 chuangte chu Ministry of Home Affairs-ah an thlen tawh thu a sawi.